21
Mārakarmaparivarta ekaviṁśatitamaḥ|
tatra khalu punaḥ subhūte
bodhisattvo mahāsattva evaṁ bhāṣiṣyate-yena satyena satyavacanena ahaṁ
vyākṛtaḥ taiḥ paurvakaistathāgatairarhadbhiḥ
samyaksaṁbuddhairanuttarāyāṁ samyaksaṁbodhau,
tena satyena satyavacena ayamamanuṣyo'pakrāmatviti| tatra subhūte māraḥ
pāpīyānautsukyamāpatsyate tasya amanuṣyasyāpakramaṇāya| tatkasya hetoḥ?
māro hyatra pāpīyāṁstasya bodhisattvasya mahāsattvasya
cirayānasaṁprasthitasyāntike balavattaraṁ tejovattaraṁ
codyogamāpatsyate-kathamayamamanuṣyo'pakrāmediti| evaṁ so'manuṣyo
mārādhiṣṭhānenāpakramiṣyati| evaṁ ca tasya bodhisattvasya mahāsattvasya
bhaviṣyati-mamaiṣo'nubhāvena amanuṣyo'pakrānta iti| na punaḥ sa evaṁ
jñāsyati-mārasyaiṣo'nubhāvena amanuṣyo'pakrānta iti| sa tena
tāvanmātrakeṇautsukyamāpatsyate| sa tenautsukyena tato'nyān bodhisattvān
mahāsattvānavamaṁsyate uccagdhayiṣyati ullāpayiṣyati kutsayiṣyati
paṁsayiṣyati-ahaṁ vyākṛtastaiḥ paurvakaistathāgatairarhadbhiḥ
samyaksaṁbuddhairanuttarāyāṁ samyaksaṁbodhāviti| sa tena tāvanmātrakeṇa
bhūyo mānaṁ janayiṣyati,
mānaṁ saṁjanayiṣyati,
mānaṁ vardhayiṣyati,
mānaṁ saṁvardhayiṣyati,
mānaṁ stambhayiṣyati,
mānamupastambhayiṣyati,
mānaṁ bṛṁhayiṣyati,
mānamupabṛṁhayiṣyati,
mānamutpādayiṣyati| sa tena mānena atimānena mānātimānena mithyāmānena
abhimānena dūrīkariṣyati sarvajñatām,
dūrīkariṣyatyanuttaraṁ buddhajñānam,
svayaṁbhūjñānam,
sarvajñajñānam| dūrīkariṣyatyanuttarāṁ samyaksaṁbodhim| sa tathārūpāṇi
kalyāṇamitrāṇi kalyāṇadharmaṇa
udārādhimuktikānadhyāśayasaṁpannānupāyakuśalānavinivartanīyadharmasamanvāgatāṁśca
bodhisattvān mahāsattvān dṛṣṭvā abhimānamutpādya
avamanyamānastathārūpāṇi kalyāṇamitrāṇi na seviṣyate,
na bhajiṣyate, na
paryupāsiṣyate, na
pariprakṣyati| tadeva mārabandhanaṁ gāḍhīkariṣyati| tasya dve bhūmī
pratikāṅkṣitavye-śrāvakabhūmirvā pratyekabuddhabhūmirvā| evaṁ subhūte
satyādhiṣṭhānena māraḥ pāpīyānacirayānasaṁprasthitasya bodhisattvasya
mahāsattvasya alpaśraddhasya alpaśrutasya kalyāṇamitravirahitasya
prajñāpāramitayā aparigṛhītasya upāyakauśalyavirahitasya antarāyaṁ
kariṣyatyanuttarāyāḥ samyaksaṁbodheḥ| idamapi subhūte bodhisattvasya
mahāsattvasya mārakarma veditavyam||
punaraparaṁ subhūte
bodhisattvasya mahāsattvasya nāmāpadeśenāpi mārakarma bhaviṣyati| kathaṁ
ca subhūte bodhisattvasya mahāsattvasya nāmāpedeśenāpi mārakarma
bhaviṣyati? iha
subhūte bodhisattvaṁ mahāsattvaṁ nāmāpadeśenāpi nāmādhiṣṭhānenāpi māraḥ
pāpīyānupasaṁkramiṣyati| anyatarānyatareṇa veṣeṇopasaṁkramya evaṁ
vakṣyati-tairvyākṛtastvaṁ paurvakaistathāgatairarhadbhiḥ
samyaksaṁbuddhairanuttarāyāṁ samyaksaṁbodhau| tatkasya hetoḥ?
tava hīdaṁ nāmadheyam| idaṁ te māturnāmadheyam| idaṁ te piturnāmadheyam|
idaṁ te bhrāturnāmadheyam| idaṁ te bhaginyā nāmadheyam| idaṁ te
mitrāmātyajñātisālohitānāṁ nāmadheyam| yāvadāsaptamaṁ
mātāmahapitāmahayugasya nāmadheyamudīrayiṣyati-amuṣyāṁ diśi tvaṁ jātaḥ,
amuṣmin janapade amuṣmin grāme vā nagare vā nigame vā jāta iti|
sacetprakṛtvā mṛduko bhaviṣyati,
tamenamevaṁ vakṣyati-pūrvamapi tvameva mṛduko'bhūḥ| sacetprakṛtyā
tīkṣṇendriyo bhaviṣyati,
tatastamevaṁ vakṣyati-pūrvamapi tvaṁ tīkṣṇendriyo'bhūḥ| sacedāraṇyako
bhaviṣyati,
sacetpiṇḍapātiko bhaviṣyati,
sacetpāṁsukūliko bhaviṣyati,
sacetkhalupaścādbhaktiko bhaviṣyati,
sacedekāsaniko bhaviṣyati,
sacedyāthāsaṁstariko bhaviṣyati,
sacetraicīvariko bhaviṣyati,
sacet śmaśāniko bhaviṣyati,
sacedvṛkṣamūliko bhaviṣyati,
sacennaiṣadyiko bhaviṣyati,
sacedabhyavakāśiko bhaviṣyati,
sacennāmantiko bhaviṣyati,
sacedalpecchaḥ saṁtuṣṭaḥ pravivikto bhaviṣyati,
sacedapagatapādamrakṣaṇo bhaviṣyati,
sacenmṛdubhāṣī alpavāg bhaviṣyati,
tamenaṁ māraḥ pāpīyāṁstena tena dṛṣṭadhārmikeṇa guṇenādekṣyati-pūrvamapi
tvamanena cānena ca guṇena samanvāgato'bhūḥ| niyatastaṁ vyākṛtastaiḥ
paurvakaistathāgatairarhadbhiḥ samyaksaṁbuddhairanuttarāyāṁ
samyaksaṁbodhau avinivartanīyāyāṁ bodhisattvabhūmau| tatkasya hetoḥ?
tathā hi te amī evaṁrūpā dhutaguṇāḥ saṁvidyante|
niścayena tvaṁ
pūrvamapyetaireva dhutaguṇaiḥ samanvāgato'bhūḥ| evaṁ sa tena paurvakeṇa
nāmāpadeśena nāmādhiṣṭhānena pratyutpannadhutaguṇasaṁlekhena ca
manyanāmutpādayiṣyati| tasyaivaṁ bhaviṣyati-vyākṛto'haṁ taiḥ
paurvakaistathāgatairarhadbhiḥ samyaksaṁbuddhairanuttarāyāṁ
samyaksaṁbodhau,
yathā me amī guṇāḥ saṁvidyante| taṁ ca māraḥ pāpīyānevaṁ
vakṣyati-avinivartanīyastvaṁ vyākṛtastathāgatenārhatā samyaksaṁbuddhena
anuttarāyāṁ samyaksaṁbodhau| tatkasya hetoḥ?
tathā hi tava ete evaṁrūpā dhutaguṇā saṁvidyante| tasya khalu punaḥ
subhūte māraḥ pāyīyān kadācidbhikṣuveṣeṇopasaṁkramiṣyati,
kadācidbhikṣuṇīveṣeṇa,
kadācidupāsakaveṣeṇa,
kadācidupāsikāveṣeṇa,
kadācidbrāhmaṇaveṣeṇa,
kadācidgṛhapativeṣeṇa,
kadācinmātṛveṣeṇa,
kadācitpitṛveṣeṇa,
kadācidbhrātṛveṣeṇa,
kadācidbhaginīveṣeṇa,
kadācinmitrāmātyajñātisālohitaveṣeṇa upasaṁkramiṣyati| upasaṁkramyaivaṁ
vakṣyati-vyākṛtastvaṁ paurvakaistathāgatairarhadbhiḥ
samyaksaṁbuddhairanuttarāyāṁ samyaksaṁbodhau avinivartanīyāyāṁ
bodhisattvabhūmau| tatkasya hetoḥ?
tathā hi te evaṁrūpā dhutaguṇāḥ saṁvidyante,
ye'vinivartanīyānāṁ bodhisattvānāṁ mahāsattvānāṁ guṇāḥ| ye khalu punaḥ
subhūte mayā avinivartanīyānāṁ bodhisattvānāṁ mahāsattvānāṁ guṇā
ākhyātāḥ ākārā liṅgāni nimittāni cākhyātāni,
tāni tasya na bhaviṣyanti| veditavyametatsubhūte
tato'nyairbodhisattvairmahāsattvaiḥ-mārādhiṣṭhito batāyaṁ bodhisattvo
mahāsattva iti| tatkasya hetoḥ?
ye ākārā yāni liṅgāni yāni nimittāni avinivartanīyānāṁ bodhisattvānāṁ
mahāsattvānām, tāni
tasya na bhaviṣyanti| sa khalu punaḥ subhūte bodhisattvo mahāsattvo'nena
nāmādhiṣṭhānena abhimānamutpādayiṣyati| abhimānamutpādya mānābhibhūtaḥ
stambhābhibhūto mārādhiṣṭhānenābhibhūtastadanyān bodhisattvān
mahāsattvānavamaṁsyate uccagghayiṣyati ullāpayiṣyati kutsayiṣyati
paṁsayiṣyati| idamapi subhūte bodhisattvena mahāsattvena nāmādhiṣṭhānena
mārakarma veditavyam||
punaraparaṁ subhūte
bodhisattvena mahāsattvena nāmāpadeśena nāmavyākaraṇena mārakarma
veditavyam| kathaṁ ca subhūte bodhisattvena mahāsattvena nāmāpadeśena
nāmavyākaraṇena mārakarma veditavyam?
iha subhūte māraḥ pāpīyān bhikṣuveṣeṇopasaṁkramya bodhisattvaṁ
mahāsattvamevaṁ vyākariṣyati-tavānuttarāṁ
samyaksaṁbodhimabhisaṁbuddhasya sataḥ idaṁ nāmadheyaṁ bhaviṣyatīti
yadeva tena cittenānuvartitamanuvitarkitamanuvicāritaṁ bhavati-aho bata
me'nuttarāṁ samyaksaṁbodhimabhisaṁbuddhasya sataḥ idamevaṁrūpaṁ
nāmadheyaṁ bhavediti,
tadeva nāmadheyaṁ vyākariṣyati| tatra duṣprajñajātīyasya
anupāyakuśalasya bodhisattvasyaivaṁ bhaviṣyati-yathā mayā
nāmadheyamanuvartitamanuvitarkitamanuvicāritam,
aho bata me'nuttarāṁ samyaksaṁbodhimabhisaṁbuddhasya sataḥ idaṁ
nāmadheyaṁ bhavediti,
tathā tena bhikṣuṇā nirdiṣṭamiti| sa evaṁ yacca nāmadheyaṁ
svayamanuvicintitam,
yacca tena māreṇa pāpīyasā mārakāyikābhirvā devatābhirabhinirmitena
mārādhiṣṭhitena vā bhikṣuṇā nāmadheyamudīritam,
tadubhayaṁ tulayitvā yathā ca mama cittotpāda utpannaḥ,
yathā ca anena bhikṣuṇā nirdiṣṭaṁ mama nāmadheyaṁ sameti nāmnā,
nāmavyākṛto'haṁ taiḥ paurvakaistathāgatairarhadbhiḥ
samyaksaṁbuddhairanuttarāyāṁ samyaksaṁbodhāviti maṁsyate| yāni ca mayā
subhūte avinivartanīyānāṁ bodhisattvānāṁ mahāsattvānāmākārā liṅgāni
nimittāni ākhyātāni,
tāni tasya na bhaviṣyanti| sa tairvirahito'nena nāmāpadeśena
nāmavyākaraṇena manyanāmutpādayiṣyati| sa manyanāmutpādya tato'nyān
bodhisattvān mahāsattvānavamaṁsyate-ahaṁ vyākṛto'nuttarāyāṁ
samyaksaṁbodhau,
naite vyākṛtā anuttarāyāṁ samyaksaṁbodhāviti| evaṁ sa tena mānena
atimānena mānātimānena abhimānena mithyāmānena ca tadanyān bodhisattvān
mahāsattvānavamanyamāno dūrīkariṣyati sarvajñatām,
dūrīkariṣyati buddhajñānam| tasya prajñāpāramitayā aparigṛhītasya
upāyakauśalyavirahitasya kalyāṇamitravirahitasya pāpamitraparigṛhītasya
dvayorbhūmyoranyatarā bhūmiḥ pratikāṅkṣitavyā-śrāvakabhūmirvā
pratyekabuddhabhūmirvā| sacetpunaściraṁ suciraṁ saṁdhāvya saṁsṛtya
enāmeva prajñāpāramitāmāgamya anuttarāṁ samyaksaṁbodhimabhisaṁboddhukāmo
bhavet, yadi
cāsāvupasarpet kalyāṇamitrāṇi,
abhīkṣṇaṁ ca tānyupasaṁkramiṣyati,
tenaiva cātmabhāvapratilambhena tāvatpūrvakāṁścittotpādān vigarhiṣyati,
vāntīkariṣyati,
jugupsiṣyati,
pratiniḥ-srakṣyati,
pratideśayiṣyati,
tathāpi buddhabhūmistasya durlabhā bhaviṣyati| tatkasya hetoḥ?
tāvadgurutaraṁ hi subhūte bodhisattvasya mahāsattvasya
mananāpattisthānam| tadyathāpi nāma subhūte bhikṣoḥ śrāvakayānikasya
śrāvakabhūmau catasro mūlāpattayo gurvyo bhavanti,
yato'nyatarānyatarā māpattimadhyāpadya
abhikṣurbhavatyaśramaṇo'śākyaputrīyaḥ,
iyameva tābhyaścatasṛbhya āpattibhyo gurutarā āpattiḥ,
yo'yaṁ mānacittotpādaḥ,
yaduta nāmāpadeśena bodhisattvasya mahāsattvasyāvamānanayā
mahānakuśalaścittotpāda utpannaḥ| ayaṁ tābhyaścatasṛbhya āpattibhyo
gurutaraścittotpādo veditavyaḥ||
tiṣṭhantu subhūte catasro
gurvyo mūlāpattayaḥ| pañcabhyo'pi subhūte ānantaryebhyaḥ karmabhyo
gurutaro'yaṁ cittotpādaḥ,
yo'yaṁ bodhisattvasya mahāsattvasya nāmāpadeśena mānasahagataścittotpāda
utpannaḥ| ayaṁ tebhyaḥ pañcabhya ānantaryebhyaḥ karmabhyo
gurutaraścittotpādo veditavyaḥ| iti hi subhūte anenāpi nāmāpadeśena
sūkṣmasūkṣmāṇi mārakarmāṇyutpatsyante| tāni bodhisattvena mahāsattvena
boddhavyāni| anyebhyaścāvabodhayitavyāni,
buddhvā ca vivarjayitavyāni||
punaraparaṁ subhūte māraḥ
pāpīyān vivekaguṇena bodhisattvaṁ mahāsattvamupasaṁkramya codayiṣyati
smārayiṣyati| kathaṁ ca subhūte māraḥ pāpīyān vivekaguṇena bodhisattvaṁ
mahāsattvamupasaṁkramya codayiṣyati smārayiṣyati?
iha subhūte māraḥ pāpīyān bodhisattvaṁ mahāsattvamupasaṁkramiṣyati,
upasaṁkramyaivaṁ vakṣyati-vivekasya tathāgato varṇavādī
araṇyavanaprasthagiriguhāśmaśānapalālapuñjādiṣu vihartavyamiti| na cāhaṁ
subhūte bodhisattvasya mahāsattvasya evaṁvidhaṁ vivekaṁ vadāmi,
yaduta āraṇyakāni prāntāni śayanāsanāni vijanapadāni viviktāni,
vividhāni vanaprasthagiriguhāśmaśānapalālapuñjādīni||
subhūtirāha-katamaḥ punaḥ sa
bhagavan bodhisattvasya mahāsattvasya anyo viveko yadi vā āraṇyakāni
prāntāni śayanāsanāni vijanapadāni viviktāni vividhāni
vanaprasthagiriguhāśmaśānapalālapuñjādīni?
yadi tāni nādhyāvasati,
kiyadrūpaḥ punarbhagavan bodhisattvasya mahāsattvasyānyo vivekaḥ?
evamukte bhagavānāyuṣmantaṁ subhūtimetadavocat-sacetsubhūte bodhisattvo
mahāsattvo vivikto bhavati śrāvakapratisaṁyuktairmanasikāraiḥ,
vivikto bhavati pratyekabuddhapratisaṁyuktairmanasikāraiḥ,
evaṁ sa bodhisattvo mahāsattvo vivikto viharati| grāmānte'pi hi viharan
prajñāpāramitopāyakauśalyaparigṛhītaḥ
sarvasattvamaitrīmahākaruṇāvihāreṇa viharet| anena vihāreṇa viharan
vivikta eva sa viharati| ayaṁ khalu punaḥ subhūte mayā bodhisattvasya
mahāsattvasya
śrāvakapratyekabuddhapratisaṁyuktamanasikāraviveko'nujñātaḥ| anena
vivekena viharan bodhisattvo mahāsattvo rātriṁdivānyatināmayati,
vivikto viharati| sacedbodhisattvo
mahāsattvo'raṇyavanaprasthagiriguhāśmaśānaprāntaśayanāsaneṣvanena
vihāreṇa viharati,
vivikto bodhisattvo mahāsattvo viharati| yaṁ punaḥ subhūte māraḥ pāpīyān
vivekamupadekṣyati
araṇyavanaprasthagiriguhāśmaśānaprāntaśayanāsanavihārān,
sa tena vivekena śrāvakapratyekabuddhapratisaṁyuktairmanasikāraiḥ
saṁkīrṇa eva san prajñāpāramitāyāmanabhiyujyamāno na sarvajñajñānaṁ
paripūrayati| evaṁ sa saṁkīrṇavihāreṇa viharan so'pariśuddhena
manasikāreṇa viharan apariśuddhakāyavāṅmanaḥkarmāntaḥ eva bhaviṣyati|
apariśuddhakāyavāṅmanaḥkarmānta eva saṁstato'nyānapi bodhisattvān
mahāsattvān grāmāntavihāriṇo'saṁkīrṇān
śrāvakapratyekabuddhapratisaṁyuktairmanasikāraiḥ
prajñopāyamahākaruṇāvihāravihāriṇo'vamaṁsyate| araṇye'pi viharan
so'pariśuddhakāyavāṅmanaḥkarmāntaḥ san saṁkīrṇavihāryeva bhavati,
na viviktavihārī| sa prajñopāyamahākaruṇāvihāravihāriṇo grāmānte
viharataḥ pariśuddhakāyavāṅmanaḥkarmasamudācārān
śrāvakapratyekabuddhapratisaṁyuktamanasikāraviviktānasaṁkīrṇān
śrāvakapratyekabuddhapratisaṁyuktairmanasikāraistāṁstāvatso'vamanyamāno
na dhyānasamādhisamāpattivimokṣābhijñānāṁ lābhī bhaviṣyati| na cāsya tāḥ
paripūriṁ gamiṣyanti| tatkasya hetoḥ?
tathā hi so'nupāyakuśalo bhavati||
kiṁcāpi subhūte bodhisattvo
mahāsattvo yojanaśatikeṣvaṭavīkāntāreṣu
viharedapagatavyālamṛgapakṣisaṁgheṣu
apagatakṣudramṛgavyālayakṣarākṣasānuvicariteṣu
apagatacaurakāntārabhayabhairavopadraveṣu saṁtiṣṭhet,
varṣaṁ vā varṣaśataṁ vā varṣasahasraṁ vā varṣaśatasahasraṁ vā varṣakoṭīṁ
vā varṣakoṭīśataṁ vā varṣakoṭīsahasraṁ vā varṣakoṭīśatasahasraṁ vā
varṣakoṭīniyutaśatasahasraṁ vā,
tato vā upari| imaṁ ca vivekaṁ mayopadiṣṭaṁ na jānīyāt,
yena vivekena bodhisattvo
mahāsattvo'dhyāśayasaṁprasthito'dhyāśayasaṁpanno viharati| taṁ
so'nupāyakuśalo bodhisattvo mahāsattvo'jānannaraṇyaparamo viharati|
tatra ca viveke niśritaḥ ālīno'dhyavasito'dhyavasāyamāpannaḥ| naiva me
subhūte etāvatā sa bodhisattvaścittamārādhayati| tatkasya hetoḥ?
yaḥ subhūte viveko bodhisattvānāṁ mahāsattvānāṁ mayā ākhyātaḥ,
tena vivekena viharannasmin viveke na saṁdṛśyate| tamenaṁ māraḥ
pāpīyānupasaṁkramya uparyantarīkṣe vihāyasi sthitvā evaṁ vakṣyati-sādhu
sādhu kulaputra, eṣa
bodhisattvānāṁ mahāsattvānāṁ tathāgatena viveka ākhyātaḥ| anenaiva tvaṁ
kulaputra vivekena vihara| evaṁ tvaṁ kṣipramanuttarāṁ
samyaksaṁbodhimabhisaṁbhotsyase| sa tato vivekātpunareva
araṇyādgrāmāntamavatīrya tadanyān bodhisattvān mahāsattvān peśalān
bhikṣūn sabrahmacāriṇaḥ kalyāṇadharmaṇo'saṁkīrṇān
śrāvakapratyekabuddhapratisaṁyuktairmanasikāraiḥ
pariśuddhakāyavāṅmanaḥkarmāntān jīvānavamaṁsyate| sa evaṁ
vakṣyati-saṁkīrṇavihāreṇa bateme āyuṣmanto viharanti,
na viviktavihāreṇa| ākīrṇavihāreṇa bateme āyuṣmanto viharanti,
na viviktavihāreṇa viharantīti| ye te bodhisattvā mahāsattvā
viviktavihāreṇa viharanti,
tān saṁkīrṇavihāreṇa codayiṣyati,
ākīrṇavihāreṇa codayiṣyati| ye ca te saṁkīrṇavihāreṇa viharanti,
tān sa viviktavihāreṇa samudācariṣyati,
tatra gauravamutpādayiṣyati| yatra ca gauravamutpādayitavyam,
tatra mānamutpādayiṣyati| tatkasya hetoḥ?
ahamamanuṣyaiścodye,
ahamamanuṣyaiḥ smārye| eṣa subhūte vihāro yenāhaṁ vihāreṇa viharāmi| kaṁ
grāmāntavihāriṇamamanuṣyāścodayiṣyanti,
kaṁ grāmāntare viharantamamanuṣyāḥ smārayiṣyanti,
ityevaṁ hi bodhisattvayānikān pudgalānavamaṁsyate| ayaṁ subhūte
bodhisattvacaṇḍālo veditavyaḥ,
bodhisattvadūṣī veditavyaḥ,
bodhisattvapratirūpako veditavyaḥ,
bodhisattvaprativarṇiko veditavyaḥ,
bodhisattvakāraṇḍavako veditavyaḥ,
cauraḥ śramaṇaveṣeṇa,
cauro bodhisattvayānikānāṁ pudgalānām,
cauraḥ sadevakasya lokasya| tajjātīyaḥ khaluḥ punaḥ subhūte pudgalo na
sevitavyo na bhaktavyo na paryupāsitavyaḥ| tatkasya hetoḥ?
abhimānapatitā hi te tathārūpāḥ pudgalā veditavyāḥ| anyeṣāmapi
tathārūpāṇāmalpa sthāmānācirayānasaṁprasthitānāṁ saṁdūṣaṇaṁ kuryuḥ|
aviśuddhadharmāṇo hi te tathārūpāḥ pudgalāḥ veditavyāḥ| anāryā hi te
tathārūpāḥ pudgalā veditavyāḥ| anāryadharmāṇo hi te tathārūpāḥ pudgalā
veditavyāḥ| yasya khalu punaḥ subhūte bodhisattvasya mahāsattvasya
aparityaktāḥ sarvasattvāḥ,
aparityaktā sarvajñatā,
aparityaktā anuttarā samyaksaṁbodhiḥ,
tena bodhisattvena mahāsattvena adhyāśayena anuttarāṁ
samyaksaṁbodhimabhisaṁboddhukāmena sarvasattvānāmarthaṁ kartukāmena
tajjātīyāḥ pudgalā na sevitavyāḥ,
na bhaktavyāḥ, na
paryupāsitavyāḥ| api tu khalu punaḥ subhūte sarvasattvānāmarthāya
abhyutthitena eteṣāṁ ca anyeṣāṁ ca mārakarmaṇāmavabodhāya
nityamevodvignacittena bhavitavyaṁ sarvasattvānāṁ
mārgamapratilabhamānānāmupadeṣṭumutrastamānasena asaṁsṛṣṭena
traidhātukena| tatrāpi tāvanmaitrāyamāṇena karuṇāyamānena
mahākaruṇāmutpādya anukampāmupādāya samyakpratipanneṣu sattveṣu
muditacittenānupalabdhidharmatayā dharmāṇāmupekṣakeṇa evaṁ
cittamutpādayitavyam-tathā kariṣyāmi yathā sarve mārakarmadoṣāḥ sarveṇa
sarvaṁ sarvathā sarvaṁ sarvatra sarvadā ca na bhaviṣyanti,
notpatsyante| sacedutpatsyante,
kṣiprameva pratigamiṣyanti,
evaṁ śikṣiṣye iti| ayamapi bodhisattvānāṁ mahāsattvānāṁ svayamabhijñāya
parākramo veditavyaḥ| idamapi subhūte bodhisattvena mahāsattvena
vivekaguṇena mārakarma veditavyamiti||
āryāṣṭasāhasrikāyāṁ
prajñāpāramitāyāṁ mārakarmaparivarto nāma ekaviṁśatitamaḥ||