31
Dharmodgataparivarta ekatriṁśattamaḥ |
evamukte dharmodgato
bodhisattvo mahāsattvaḥ sadāpraruditaṁ bodhisattva
mahāsattvametadavocat-na khalu kulaputra tathāgatāḥ kutaścidāgacchanti
vā gacchanti vā | acalitā hi tathatā | yā ca tathatā,
sa tathāgataḥ | na hi kulaputra anutpāda āgacchati vā gacchati vā |
yaśca anutpādaḥ, sa
tathāgataḥ | na hi kulaputra bhūtakoṭyā āgamanaṁ vā gamanaṁ vā
prajñāyate | yā ca bhūtakoṭiḥ,
sa tathāgataḥ | na hi kulaputra śūnyatāyā āgamanaṁ vā gamanaṁ vā
prajñāyate| yā ca śūnyatā,
sa tathāgataḥ | na hi kulaputra yathāvattāyā āgamanaṁ vā gamanaṁ vā
prajñāyate | yā ca yathāvattā,
sa tathāgataḥ | na hi kulaputra virāgasyāgamanaṁ vā gamanaṁ vā
prajñāyate | yā ca virāgatā,
sa tathāgataḥ | na hi kulaputra nirodhasyāgamanaṁ vā gamanaṁ vā
prajñāyate | yaśca nirodhaḥ,
sa tathāgataḥ | na hi kulaputra ākāśadhātorāgamanaṁ vā gamanaṁ vā
prajñāyate | yaśca ākāśadhātuḥ,
sa tathāgataḥ | na hi kulaputra anyatra ebhyo dharmebhyastathāgataḥ | yā
ca kulaputra eṣāmeva dharmāṇāṁ tathatā,
yā ca sarvadharmatathatā,
yā ca tathāgatatathatā,
ekaivaiṣā tathatā| nāsti kulaputra tathatāyā dvaidhīkāraḥ| ekaivaiṣā
tathatā kulaputra| tathatā na dve na tisraḥ| gaṇanāvyativṛttā kulaputrā
tathatā yaduta asattvāt | tadyathāpi nāma kulaputra puruṣo
grīṣmābhitapto grīṣmāṇāṁ paścime māse'bhigate madhyāhnakālasamaye
marīcikāṁ paśyet syandamānām| sa tena tena pradhāvet-atrodakaṁ pāsyāmi,
apānīyaṁ pāsyāmīti | tatkiṁ manyase kulaputra kuta etadudakamāgataṁ kva
vā tadudakaṁ gacchati,
pūrvaṁ vā mahāsamudraṁ dakṣiṇaṁ vā paścimaṁ vā uttaraṁ vā
?
sadāprarudita āha-na hi kulaputra marīcikāyāmudakaṁ saṁvidyate| kiṁ
punarasyāgamanaṁ vā gamanaṁ vā prajñāyate
?
sa khalu punaḥ kulaputra puruṣo grīṣmābhitapto bālajātīyo
duṣprajñajātīyo marīcikāṁ dṛṣṭvā anudake udakasaṁjñāmutpādayati | na
punastatrodakaṁ svabhāvataḥ saṁvidyate | dharmodgata
āha-evametatkulaputra,
evametat|
evameva kulaputra ye
kecittathāgatarūpeṇa vā ghoṣeṇa vā abhiniviṣṭāḥ,
te tathāgatasyāgamanaṁ ca gamanaṁ ca kalpayanti| ye ca
tathāgatasyāgamanaṁ ca gamanaṁ ca kalpayanti,
sarve te bālajātīyā duṣprajñajātīyā iti vaktavyāḥ,
tadyathāpi nāma sa eva puruṣo yo'nudake udakasaṁjñāmutpādayati |
tatkasya hetoḥ ? na
hi tathāgato rūpakāyato draṣṭavyaḥ | dharmakāyāstathāgatāḥ | na ca
kulaputra dharmatā āgacchati vā gacchati vā | evameva kulaputra nāsti
tathāgatānāmāgamanaṁ vā gamanaṁ vā | tadyathāpi nāma kulaputra
māyākāranirmitasya hastikāyasya vā aśvakāyasya vā rathakāyasya vā
pattikāyasya vā nāstyāgamanaṁ vā gamanaṁ vā,
evameva kulaputra nāsti tathāgatānāmāgamanaṁ vā gamanaṁ vā | tadyathāpi
nāma kulaputra puruṣaḥ suptaḥ svapnāntaragata ekaṁ vā tathāgataṁ paśyet,
dvau vā trīn vā caturo vā pañca vā ṣaḍvā sapta vā aṣṭau vā nava vā daśa
vā viṁśatiṁ vā triṁśadvā catvāriṁśadvā pañcāśadvā śataṁ vā sahasraṁ vā,
tato vā uttare | sa prativibuddhaḥ san ekamapi tathāgataṁ na paśyet |
tatkiṁ manyase kulaputra kutaste tathāgatā āgatāḥ kva vā te tathāgatā
gatā iti ?
sadāprarudita āha-na khalu punaḥ kulaputra svapne kasyaciddharmasya
pariniṣpattiḥ prajñāyate | mṛṣāvādo hi svapno'bhūt | dharmodgata
āha-evameva kulaputra sarvadharmāḥ svapnopamā uktā bhagavatā | ye
kecitkulaputra svapnopamān sarvadharmāṁstathāgatena nirdeśitān
yathābhūtaṁ na prajānanti,
te tathāgatān nāmakāyena vā rūpakāyena vā abhiniviśya
tathāgatānāmāgamanaṁ vā gamanaṁ vā kalpayanti | yathāpi nāma
dharmatāmaprajānanto ye ca tathāgatānāmāgamanaṁ vā gamanaṁ vā kalpayanti,
sarve te bālajātīyāḥ pṛthagjanāḥ |
sarve te ṣaḍgatikaṁ saṁsāraṁ
gatāḥ, gacchanti
gamiṣyanti ca | sarve te prajñāpāramitāyā dūre | sarve te
buddhadharmāṇāṁ dūre | ye khalu punaḥ kulaputra svapnopamān sarvadharmān
svapnopamāḥ sarvadharmā iti tathāgatena deśitān yathābhūtaṁ prajānanti,
na te kasyaciddharmasyāgamanaṁ vā gamanaṁ vā kalpayanti,
utpādaṁ vā nirodhaṁ vā | ye ca na kasyaciddharmasyāgamanaṁ vā gamanaṁ vā
kalpayanti, utpādaṁ
vā nirodhaṁ vā, te
dharmatayā tathāgataṁ prajānanti | ye ca tathāgataṁ dharmatayā
prajānanti, na te
tathāgatānāmāgamanaṁ vā gamanaṁ vā kalpayanti | ye ca tathāgatasyedṛśīṁ
dharmatāṁ prajānanti,
te āsannā anuttarāyāḥ samyaksaṁbodheścaranti | te ca prajñāpāramitāyāṁ
caranti | te ca bhagavataḥ śrāvakāḥ amoghaṁ rāṣṭrapiṇḍaṁ paribhuñjate |
te ca lokasya dakṣiṇīyāḥ | tadyathāpi nāma kulaputra mahāsamudre ratnāni
na pūrvasyā diśa āgacchanti,
na dakṣiṇasyāḥ, na
paścimāyāḥ,
nottarasyāḥ, na
vidigbhyo nādhastānnopariṣṭānna kutaściddeśebhyo digbhya āgacchanti,
api tu khalu punaḥ sattvānāṁ kuśalamūlānyupādāya mahāsamudre
ratnānyutpadyante | na va tānyahetukānyutpadyante |
hetupratyayakāraṇādhīnāni pratītyasamutpannāni | nirudhyamānāni ca tāni
ratnāni ca kvaciddaśadiśi loke saṁkrāmanti | api tu khalu punaryeṣāṁ
pratyayānāṁ satāṁ tāni ratnāni prabhāvyante,
teṣāṁ pratyayānāmasatāṁ na teṣāṁ ratnānāṁ prabhāvanā bhavati | evameva
kulaputra teṣāṁ tathāgatānāṁ kāyapariniṣpattirna kutaściddaśadiśi
lokādāgatā, nāpi
kvaciddaśadiśi loke gacchati | na ca ahetuko buddhānāṁ bhagavatāṁ kāyaḥ
| pūrvacaryāpariniṣpanno hetupratyayādhīnaḥ kāraṇasamutpannaḥ
pūrvakarmavipākādutpannaḥ |
sa na kvaciddaśadiśi
loke'sti| api tu khalu punaryeṣāṁ pratyayānāṁ satāṁ
kāyābhiniṣpattirbhavati,
teṣāṁ pratyayānāmasatāṁ kāyābhiniṣpattirna prajñāyate | tadyathāpi nāma
kulaputra vīṇāyāḥ śabda utpadyamāno na kutaścidāgacchati,
nirudhyamāno'pi na kvacidgacchati,
na kvacitsaṁkrāmati,
pratītya ca hetupratyayasāmagrīmutpadyate hetvadhīnaḥ pratyayādhīnaḥ |
tadyathāpi nāma droṇīṁ ca pratītya carma ca pratītya tantrīśca pratītya
daṇḍaṁ ca pratītya upadhānīśca pratītya koṇaṁ ca pratītya puruṣasya ca
tajjavyāyāmaṁ pratītya evamayaṁ vīṇāyāḥ śabdo niścarati hetvadhīnaḥ
pratyayādhīnaḥ | sa ca śabdo na droṇyā niścarati,
na carmaṇo na tantrībhyo na daṇḍānnopadhānībhyo na koṇānna puruṣasya
tajjavyāyāmataḥ śabdo niścarati,
api tu khalu punaḥ sarveṣāṁ samāyogācchabdaḥ prajñapyate |
nirudhyamāno'pi śabdo na kvacidgacchati | evameva kulaputra buddhānāṁ
bhagavatāṁ kāyaniṣpattirhetvadhīnā pratyayādhīnā
anekakuśalamūlaprayogapariniṣpannā ca | na caikato hetuto na caikataḥ
pratyayato na caikataḥ kuśalamūlato buddhakāyaprabhāvanā| na ca
nairhetukī | bahuhetupratyayasāmagryāṁ samutpannā sā na
kutaścidāgacchati | hetupratyayasāmagryāmasatyāṁ na kvacidgacchati |
evaṁ tvayā kulaputra teṣāṁ tathāgatānāmāgamanaṁ ca gamanaṁ ca
draṣṭavyam| sarvadharmāṇāmapi kulaputra tvayā iyameva dharmatā
anugantavyā | yataḥ kulaputra tvamevaṁ tathāgatāṁśca sarvadharmāṁśca
anutpannānaniruddhāṁśca saṁprajñāsyasi,
tatastvaṁ niyato bhaviṣyasyanuttarāyāṁ samyaksaṁbodhau |
prajñāpāramitāyāmupāyakauśalye ca niyataṁ cariṣyasi ||
asmin khalu
punastathāgatānāmanāgatyagamananirdeśe bhāṣyamāṇe mahān bhūmicālo'bhūt |
sarvaśca trisāhasramahāsāhasro lokadhātuḥ ṣaḍvikāramahādaśamahānimittaṁ
kampate prakampate saṁprakampate,
calati pracalati saṁpracalati,
vedhate pravedhate saṁpravedhate,
raṇati praraṇati saṁpraraṇati,
kṣubhyati prakṣubhyati saṁprakṣubhyati,
garjati pragarjati saṁpragarjati sma | sarvāṇi ca mārabhavanāni
saṁkṣobhitāni jihmībhūtāni cābhūvan | ye kecana trisāhasramahāsāhasre
lokadhātau tṛṇagulmauṣadhivanaspatayaḥ,
te sarve yena dharmodgato bodhisattvo mahāsattvastena praṇatā abhūvan |
akālapuṣpāṇi cotsṛjanti sma | upariṣṭācca antarīkṣānmahāpuṣpavarṣaḥ
prāvarṣat | śakraśca devānāmindraścatvāraśca mahārājāno dharmodgataṁ
bodhisattvaṁ mahāsattvaṁ divyaiścandanacūrṇairdivyaiśca puṣpairavākiran
abhyavākiran abhiprākiran | evaṁ ca vācamabhāṣanta-sādhu sādhu kulaputra
| tava kulaputra anubhāvena adyāsmābhiḥ paramārthanirjātā kathā
deśyamānā śrutā sarvalokavipratyanīkā,
yatrābhūmiḥ sarvasatkāyadṛṣṭipratiṣṭhitānāṁ
sarvāsaddṛṣṭyabhiviniviṣṭānāṁ sattvānām ||
atha khalu sadāprarudito
bodhisattvo mahāsattvo dharmodgataṁ bodhisattvaṁ
mahāsattvametadavocat-kaḥ punaḥ kulaputra atra hetuḥ,
kaḥ pratyayo'sya mahataḥ pṛthivīcālasya loke prādurbhāvāya
?
dharmodgato bodhisattvo mahāsattva āha-imaṁ kulaputra
tathāgatānāmanāgatyagamananirdeśaṁ tava ca pṛcchato mama ca
nirdiśato'ṣṭānāṁ prāṇisahasrāṇāmanutpattikadharmakṣāntipratilambho'bhūt|
aśīteśca prāṇiniyutānāmanuttarāyāṁ samyaksaṁbodhau cittānyutpannāni,
catuḥṣaṣṭeśca prāṇisahasrāṇāṁ virajāṁsi vigatamalāni dharmeṣu
dharmacakṣūṁṣi viśuddhāni ||
atha khalu sadāprarudito
bodhisattvo mahāsattvaḥ paramodāreṇa prītiprāmodyena
samanvāgato'bhūt-lābhā me paramasulabdhāḥ,
yasya me prajñāpāramitāmimaṁ ca tathāgatānāmanāgatyagamananirdeśaṁ
paripṛcchataḥ iyatāṁ sattvānāmarthaḥ kṛtaḥ | etadevāsmākaṁ paryāptaṁ
kuśalaṁ bhavedanuttarāyāḥ samyaksaṁbodheḥ pariniṣpattaye | na ca me
bhūyo vicikitsā pravartate'nuttarāyāḥ samyaksaṁbodheḥ | niḥsaṁśayamahaṁ
tathāgato bhaviṣyāmyarhan samyaksaṁbuddhaḥ | sa tenaiva prītiprāmodyena
samanvāgataḥ saptatālaṁ vihāyasamabhyudgamya saptatāle sthitvā evaṁ
cintayati sma-kenāhametarhi antarīkṣe sthitaḥ dharmodgataṁ bodhisattvaṁ
mahāsattvaṁ satkuryāmiti ?
atha khalu śakro devānāmindra sadāpraruditaṁ bodhisattvaṁ
mahāsattvamabhyudgataṁ dṛṣṭvā cetasaiva cāsya cittamājñāya divyāni
cāsmai māndāravāṇi puṣpāṇyupanāmayati sma,
evaṁ cāvocat-ebhistvaṁ kulaputra divyaiḥ puṣpairdharmodgataṁ
bodhisattvaṁ mahāsattvaṁ satkuru| satkartavyo hi kulaputra asmābhistava
parigrāhakaḥ| tava hi kulaputra anubhāvena adya bahūnāṁ
prāṇisahasrāṇāmarthaḥ kṛtaḥ | durlabhāḥ kulaputra evaṁrūpāḥ sattvāḥ,
ye sarvasattvānāṁ kṛtaśo'prameyānasaṁkhyeyān kalpānutsahante mahāntaṁ
bhāramudvoḍhuṁ yathā tvayā utsoḍham ||
atha khalu sadāprarudito
bodhisattvo mahāsattvaḥ śakrasya devānāmindrasyāntikānmāndāravāṇi
puṣpāṇi gṛhītvā dharmodgataṁ bodhisattvaṁ mahāsattvamavākirat,
abhyavākirat,
abhiprākirat | svakena ca kāyena dharmodgataṁ bodhisattvaṁ
mahāsattvamabhicchādayati sma| evaṁ ca vācamabhāṣata-eṣo'haṁ kulaputra
adyāgreṇa tavātmānaṁ niryātayāmi upasthānaparicaryāyai | sa ātmānaṁ
niryātya dharmodgatasya bodhisattvasya mahāsattvasya purataḥ prāñjaliṁ
kṛtvāsthāt ||
atha khalu sā śreṣṭhidārikā
tāni ca pañca dārikāśatāni sadāpraruditaṁ bodhisattvaṁ
mahāsattvametadavocat-etā vayamapi kulaputra tavātmānaṁ niryātayāmaḥ,
vayamapyanena kuśalamūlena eteṣāmeva dharmāṇāṁ lābhinyo bhavema,
tvayaiva ca sārdhaṁ punaḥ punarbuddhāṁśca bhagavato bodhisattvāṁśca
satkuryāma gurukuryāma | āsannībhūtāśca tavaiva bhavema | atha khalu
sadāprarudito bodhisattvo mahāsattvaḥ śreṣṭhidārikāṁ tāni ca pañca
dārikāśatānyetadavocat-yadi me yūyaṁ dārikā adhyāśayamanuvartadhvam,
adhyāśayena ca mahyamātmānaṁ niryātayata,
evamahaṁ yuṣmān pratīccheyam| dārikā āhuḥ-anuvartiṣyāmahe tava
vayamāśayenādhyāśayena ca | vayaṁ tavātmānaṁ niryātayāmo
yathecchākaraṇīyatāyai | atha khalu sadāprarudito bodhisattvo
mahāsattvastāni śreṣṭhidārikāpramukhāni pañca dārikāśatāni
sarvālaṁkārabhūṣitāni kṛtvā tāni ca pañca rathaśatānyalaṁkṛtya sarvāṇi
ca tāni dharmodgatāya bodhisattvāya mahāsattvāya niryātayati sma
upasthānaparicaryāyaiḥ-imāḥ kulaputra ahaṁ tavopasthāyikā niryātayāmi,
imāni ca pañca rathaśatāni niryātayāmi paribhogāyeti ||
atha khalu śakro
devānāmindrastasmai kulaputrāya sādhukāramadāt-sādhu sādhu kulaputra |
bodhisattvairmahāsattvaiḥ sarvasvaparityāgibhirbhavitavyam| evaṁrūpeṇa
ca tyāgacittena bodhisattvo mahāsattvaḥ kṣipramanuttarāṁ
samyaksaṁbodhimabhisaṁbudhyate | evaṁ ca dharmabhāṇakāṇāṁ pūjāṁ kṛtvā
śakyaṁ prajñāpāramitāmupāyakauśalyaṁ ca śrotum| tairapi kulaputra
paurvakaistathāgatairarhadbhiḥ samyaksaṁbuddhaiḥ pūrvaṁ
bodhisattvacaryāṁ caradbhirevaṁrūpa eva tyāge sthitvā anuttarā
samyaksaṁbodhiḥ samudānītā prajñāpāramitāmupāyakauśalyaṁ ca
paripraśnayadbhiriti ||
atha khalu dharmodgato
bodhisattvo mahāsattvastāni śreṣṭhidārikāpramukhāni pañca dārikāśatāni
pañca rathaśatāni sadāpraruditasya bodhisattvasya mahāsattvasya
kuśalaparipūrimupādāya pratigṛhṇīte sma| pratigṛhya ca
sadāpraruditāyaiva kulaputrāya pratiniryātayāmāsa| atha khalu
dharmodgato bodhisattvo mahāsattva utthāyāsanāt svakaṁ gṛhaṁ prāvikṣat
sūryasya cāstaṁgamanakālo'bhūt ||
atha khalu sadāpraruditasya
bodhisattvasya mahāsattvasyaitadabhūt-naitanmama sādhu pratirūpaṁ bhavet,
yadahaṁ dharmakāmatayā āgatya niṣīdeyam,
śayyāṁ ca parikalpayeyam | yannvahaṁ dvābhyāmeva īryāpathābhyāṁ sthitvā
sthānena caṁkrameṇa ca kālamatināmayeyam,
yāvaddharmodgato bodhisattvo mahāsattvaḥ svakādgṛhānnirgato bhaviṣyati
yaduta dharmasaṁprakāśanāyeti ||
atha khalu dharmodgato
bodhisattvo mahāsattvaḥ sapta varṣāṇyekasamādhisamāpanna evābhūt |
aprameyairasaṁkhyeyairbodhisattvasamādhisahasraiḥ
prajñāpāramitopāyakauśalyanirjātairvyāhārṣīt| sadāprarudito'pi
bodhisattvo mahāsattva sapta varṣāṇi dvābhyāmeva īryāpathābhyāṁ
kālamatināmayan na styānamiddhamavakrāmayāmāsa | sapta varṣāṇi ca
kāmavitarkamutpādayāmāsa,
na vyāpādavitarkaṁ na vihiṁsāvitarkamutpādayāmāsa,
na rasagṛddhiṁ na cittaudbilyamutpādayāmāsa | api tu kadā nāma
dharmodgato bodhisattvo mahāsattvo'smātsamādhervyutthāsyati,
yannu vayaṁ dharmodgatasya bodhisattva mahāsattvasya dharmāsanaṁ
prajñapayiṣyāmaḥ,
yatrāsau kulaputro niṣadya dharmaṁ deśayiṣyatīti| taṁ ca pṛthivīpradeśaṁ
susiktaṁ sumṛṣṭaṁ ca kariṣyāmo nānāpuṣpābhikīrṇam,
yatra pṛthivīpradeśe dharmodgato bodhisattvo mahāsattvaḥ
prajñāpāramitāmupāyakauśalyaṁ ca saṁprakāśayiṣyatīti cintayāmāsa |
tānyapi śreṣṭhidārikāpramukhāni pañca dārikāśatāni sadāpraruditasya
bodhisattvasya mahāsattvasyānuśikṣamāṇāni dvābhyāmeva īryāpathābhyāṁ
kālamatināmayāmāsuḥ sarvāḥ kriyāstasyānuvartamānāḥ ||
atha khalu sadāprarudito
bodhisattvo mahāsattvo divyaṁ nirghoṣamaśrauṣīt-itaḥ saptame divase
dharmodgato bodhisattvo mahāsattvo'smātsamādhervyutthāsyati,
vyutthāya ca madhyenagarasya niṣadya dharmaṁ deśayiṣyatīti| atha khalu
sadāprarudito bodhisattvo mahāsattvastaṁ divyaṁ nirghoṣaṁ śrutvā tuṣṭa
udagra āttamanāḥ pramuditaḥ prītisaumanasyajātastaṁ pṛthivīpradeśaṁ
śodhayāmāsa sārdhaṁ śreṣṭhidārikāpramukhaiḥ pañcadārikāśataiḥ,
dharmāsanaṁ ca prajñapayāmāsa saptaratnamayam,
svakaṁ cottarāsaṅgaṁ kāyādavatārya tasyāsanasyopari prajñapayati sma|
atha khalu tā dārikāḥ svakasvakānuttarāsaṅgān kāyādavatārya
pañcottarāsaṅgaśatāni tatrāsane prajñapayāmāsuḥ atrāsane dharmodgato
bodhisattvo mahāsattvo niṣadya dharmaṁ deśayiṣyatīti | evaṁ tāśca sarvā
dārikā dharmodgatasya bodhisattvasya mahāsattvasya dharmāsanamāstīrya
tuṣṭā udagrā āttamanasaḥ pramuditāḥ prītisaumanasya jātā abhūvan ||
atha khalu sadāprarudito
bodhisattvo mahāsattvastaṁ pṛthivīpradeśaṁ sektukāmaḥ| na codakaṁ
samantātparyeṣamāṇo'pi labhate,
yena taṁ pṛthivīpradeśaṁ siñcet| yathāpi nāma māreṇa pāpīyasā
tatsarvamudakamantardhāpitamabhūt,
apyeva nāma asya sadāpraruditasya bodhisattvasya
mahāsattvasyodakamalabhamānasya cittaṁ khidyeta,
duḥkhadaurmanasyaṁ ca bhavet,
cittasya vā anyathātvaṁ bhavet,
yenāsya kuśalamūlasyāntardhānaṁ bhavet,
na vā pūjā bhrājeran ||
atha khalu sadāpraruditasya
bodhisattvasya mahāsattvasyaitadabhūt-yannvahamātmanaḥ kāyaṁ viddhvā
imaṁ pṛthivīpradeśaṁ rudhireṇa siñceyam| tatkasya hetoḥ
?
ayaṁ hi pṛthivīpradeśa uddhatarajaskaḥ | mā rajodhāturito
bhūpredeśāddharmodgatasya bodhisattvasya mahāsattvasya kāye nipatet| kiṁ
vā anenātmabhāvenāvaśyaṁ bhedanadharmiṇā kuryām
?
varaṁ khalu punarmamāyaṁ kāya evaṁrūpayā kriyayā vinaśyatu,
na tu niḥsāmarthyakriyayā | api ca kāmahetoḥ kāmanidānaṁ bahūni me
ātmabhāvasahasrāṇi punaḥ punaḥ saṁsāre saṁsarato bhinnāni,
na punarevaṁrūpeṣu sthāneṣu saddharmaparigrahasya kṛtaśaḥ| yadi
punarbhidyante,
kāmamevaṁrūpeṣu bhidyantāmiti | atha khalu sadāprarudito bodhisattvo
mahāsattva iti pratisaṁkhyāya tīkṣṇaṁ śastraṁ gṛhītvā svakāyaṁ samantato
viddhvā taṁ pṛthivīpradeśaṁ svarudhireṇa sarvamasiñcat| tānyapi
śreṣṭhidārikāpramukhāni pañcadārikāśatāni sadāpraruditasya
bodhisattvasya mahāsattvasyānuśikṣamāṇāni sarvāṇi tāni tīkṣṇāni śastrāṇi
gṛhītvā svakasvakāni śarīrāṇi viddhvā taṁ pṛthivīpradeśaṁ
svakasvakairlohitaiḥ sarvamasiñcan | na ca sadāpraruditasya
bodhisattvasya mahāsattvasya tāsāṁ vā sarvāsāṁ dārikāṇāṁ
cittasyānyathātvamabhūt,
yatra sa māraḥ pāpīyānavatāraṁ labhet kuśalamūlāntarāyakaraṇāya ||
atha khalu śakrasya
devānāmindrasyaitadabhūt-āścaryaṁ yāvaddharmakāmaścāyaṁ sadāprarudito
bodhisattvo mahāsattvaḥ,
yāvaddṛḍhasamādānaśca yāvanmahāsaṁnāhasaṁnaddhaśca anapekṣaḥ kāye
jīviteṣu bhogeṣu ca,
anuttarāyāḥ samyaksaṁbodheradhigamāya adhyāśayasaṁprasthitaḥ| yaduta
sarvasattvān mocayiṣyāmyaparimāṇataḥ saṁsāraduḥkhādanuttarāṁ
samyaksaṁbodhimabhisaṁbudhyeti| atha khalu śakro devānāmidrastatsarvaṁ
lohitodakaṁ divyaṁ candanodakamadhyatiṣṭhat,
samantācca tasya pṛthivīpradeśasya acintyaṁ paramodāraṁ gandhaṁ yasya
divyasya candanodakasya paripūrṇam| yojanaśataṁ gandho vāti ||
atha śakro devānāmindraḥ
sadāpraruditaṁ bodhisattvaṁ mahāsattvametadavocat-sādhu sādhu kulaputra|
sādhu te kulaputra acintyaṁ vīryam,
sādhvī ca te anuttarā dharmakāmatā dharmaparīṣṭiśca| evaṁrūpeṇa
kulaputra adhyāśayena evaṁrūpeṇa vīryeṇa evaṁrūpayā ca dharmakāmatayā
taiḥ paurvakaistathāgatairarhadbhiḥ samyaksaṁbuddhairanuttarā
samyaksaṁbodhiḥ samudānītā ||
atha khalu sadāpraruditasya
bodhisattvasya mahāsattvasyaitadabhūt-prajñaptaṁ mayā dharmodgatasya
bodhisattvasya mahāsattvasya dharmāsanam| ayaṁ ca pṛthivīpradeśaḥ
susiktaḥ susaṁmṛṣṭaśca kṛtaḥ| kuto nu khalvahaṁ puṣpāṇi labheyam,
yairahamimaṁ pṛthivīpradeśaṁ puṣpābhikīrṇaṁ kuryām,
dharmodgataṁ ca bodhisattvaṁ mahāsattvaṁ dharmaṁ deśayantaṁ dharmāsane
niṣaṇṇamabhyavakireyam ?
atha khalu śakro devānāmindraḥ sadāpraruditaṁ bodhisattvaṁ
mahāsattvametadavocat- imāni te kulaputra pratigṛhāṇa divyāni
māndāravāṇi puṣpāṇi | ebhistvamimaṁ pṛthivīpradeśaṁ puṣpābhikīrṇaṁ kuru,
dharmodgataṁ ca bodhisattvaṁ mahāsattvaṁ dharmaṁ deśayantaṁ dharmāsane
niṣaṇṇamabhyavakira | sa tasmai divyaṁ khārīsahasraṁ divyānāṁ
māndāravapuṣpāṇāmupanāmayati sma| atha khalu sadāprarudito bodhisattvo
mahāsattvastāni puṣpāṇi gṛhītvā anyataraiḥ puṣpaistaṁ pṛthivīpradeśaṁ
puṣpābhikīrṇamakārṣīt,
anyataraiśca puṣpairdharmodgataṁ bodhisattvaṁ mahāsattvamabhyavākirat ||
atha khalu dharmodgato
bodhisattvo mahāsattvaḥ saptānāṁ varṣāṇāmatyayena tataḥ
samādhervyutthāya yena dharmāsanaṁ tenopasaṁkramya prajñapta evāsane
nyaṣīdat,
anekaśatasahasrayā parṣadā parivṛtaḥ puraskṛtaḥ prajñāpāramitāṁ
deśayāmāsa ||
atha khalu sadāprarudito
bodhisattvo mahāsattvaḥ sahadarśanenaiva dharmodgatasya bodhisattvasya
mahāsattvasya tādṛśaṁ sukhaṁ pratilabhate sma,
tadyathāpi nāma prathamadhyānasamāpanna ekāgramanasikāro bhikṣuḥ|
tatreyaṁ dharmodgatasya bodhisattvasya mahāsattvasya
prajñāpāramitādeśanāyaduta sarvadharmasamatayā prajñāpāramitāsamatā |
sarvadharmaviviktatayā prajñāpāramitāviviktatā | sarvadharmācalanatayā
prajñāpāramitācalanatā | sarvadharmāmananatayā prajñāpāramitāmananatā |
sarvadharmāstambhitatayā prajñāpāramitāstambhitatā |
savadharmaikarasatayā prajñāpāramitaikarasatā | sarvadharmāparyantatayā
prajñāpāramitāparyantatā | sarvadharmānutpādatayā
prajñāpāramitānutpādatā | sarvadharmānirodhatayā prajñāpāramitānirodhatā
| gaganāparyantatayā prajñāpāramitāparyantatā | samudrāparyantatayā
prajñāpāramitāparyantatā | meruvicitratayā prajñāpāramitāvicitratā|
gaganākalpanatayā prajñāpāramitākalpanatā | rūpāparyantatayā
prajñāpāramitāparyantatā | evaṁ vedanā saṁjñā saṁskārāḥ |
vijñānāparyantatayā prajñāpāramitāparyantatā | pṛthivīdhātvaparyantatatā
prajñāpāramitāparyantatā |
evamabdhātutejodhātuvāyudhātvākāśadhātvaparyantatayā
prajñāpāramitāparyantatā | vijñānadhātvaparyantatayā
prajñāpāramitāparyantatā | vajropamadharmasamatayā prajñāpāramitāsamatā
| sarvadharmāsaṁbhedanatayā prajñāpāramitāsaṁbhedanatā |
sarvadharmānupalabdhitayā prajñāpāramitānupalabdhitā |
sarvadharmābhibhāvanāsamatayā prajñāpāramitābhibhāvanāsamatā |
sarvadharmaniśceṣṭatayā prajñāpāramitāniśceṣṭatā| sarvadharmācintyatayā
prajñāpāramitācintyatā veditavyeti ||
atha khalu sadāpraruditasya
bodhisattvasya mahāsattvasya tathāniṣaṇṇasyaiva tasyāṁ belāyāṁ
sarvadharmasamatā nāma samādhirājo jātaḥ| yataḥ sarvadharmaviviktaśca
nāma samādhiḥ,
sarvadharmācalanaśca nāma samādhiḥ,
sarvadharmāmananaśca nāma samādhiḥ,
sarvadharmāstambhitaśca nāma samādhiḥ,
sarvadharmaikarasaśca nāma samādhiḥ,
sarvadharmāparyantaśca nāma samādhi,
sarvadharmānutpādaśca nāma samādhiḥ,
sarvadharmānirodhaśca nāma samādhiḥ,
gaganāparyataśca nāma samādhiḥ,
samudrāparyantaśca nāma samādhiḥ,
meruvicitraśca nāma samādhiḥ,
gaganākalpaśca nāma samādhiḥ,
rūpāparyantaśca nāma samādhiḥ | evaṁ vedanā saṁjñā saṁskārāḥ|
vijñānāparyantaśca nāma samādhiḥ,
pṛthivīdhātvaparyantaśva nāma samādhiḥ,
evamabdhātutejodhātuvāyudhātvākāśadhātvaparyantaśca nāma samādhiḥ,
vijñānadhātvaparyantaśca nāma samādhiḥ,
vajropamaśca nāma samādhiḥ,
sarvadharmāsaṁbhedaśca nāma samādhiḥ,
sarvadharmānupalabdhiśca nāma samādhiḥ,
sarvadharmāvibhāvanāsamatā ca nāma samādhiḥ,
sarvadharmaniśceṣṭaśca nāma samādhiḥ,
sarvadharmācintyaśca nāma samādhiḥ| evaṁpramukhāni ṣaṣṭiḥ
samādhimukhaśatasahasrāṇi sadāpraruditena bodhisattvena mahāsattvena
pratilabdhānyabhūvanniti ||
āryāṣṭasāhasrikāyāṁ
prajñāpāramitāyāṁ dharmodgataparivarto nāmaikatriṁśattamaḥ ||