32
Parīndanāparivarto dvātriṁśattamaḥ |
sahapratilabdhānāṁ ca
subhūte ṣaṣṭyāḥ samādhimukhaśatasahasrāṇāṁ sadāprarudito bodhisattvo
mahāsattvaḥ pūrvasyāṁ diśi,
dakṣiṇasyāṁ paścimāyāmuttarasyāṁ diśi,
vidikṣu adha ūrdhvaṁ ca diśi daśasu dikṣu gaṅgānadīvālukopameṣu
trisāhasramahāsāhasreṣu lokadhātuṣu gaṅgānadīvālukopamān buddhān
bhagavataḥ paśyati sma bhikṣusaṁghaparivṛtān bodhisattvaguṇapuraskṛtān
etaireva nayairebhireva nāmabhiretairevākṣarairimāmeva prajñāpāramitāṁ
bhāṣamāṇān| tadyathāpi nāma ahametarhi asminneva trisāhasramahāsāhasre
lokadhātau dharmaṁ deśayāmi bhikṣusaṁghaparivṛto
bodhisattvagaṇapuraskṛtaḥ,
ebhireva nayairebhireva nāmabhirebhirevākṣarairimāmeva prajñāpāramitāṁ
bhāṣe| so'cintyena bāhuśrutyena śrutasāgaratayā ca samanvāgato'bhūt,
sarvāsu ca jātiṣu na jātu buddhavirahito'bhūt| yatra yatra buddhā
bhagavantaḥ saṁmukhībhūtā bhavanti,
tatra tatropapadyate sma | avirahitaśca bhavati sma buddhairbhagavadbhiḥ,
antataḥ svapnāntaragato'pi| sarve ca anena akṣaṇā vivarjitāḥ,
kṣaṇasaṁpaccārāgitā ||
tatra khalu
punarbhagavānāyuṣmantamānandamāmantrayate sma-tadanenāpi te ānanda
paryāyeṇa evaṁ veditavyam-ityapīyaṁ prajñāpāramitā bodhisattvānāṁ
mahāsattvānāṁ sarvajñajñānasyāhāriketi| tasmāttarhi ānanda
bodhisattvairmahāsattvaiḥ sarvajñajñānaṁ pratilabdhukāmairasyāṁ
prajñāpāramitāyāṁ caritavyam| iyaṁ prajñāpāramitā śrotavyā udgrahītavyā
dhārayitavyā vācayitavyā paryavāptavyā pravartayitavyā
deśayitavyopadeṣṭavyoddeṣṭavyā svādhyātavyā likhitavyā |
tathāgatādhiṣṭhānena mahāpustake pravyaktapravyaktairakṣaraiḥ sulikhitāṁ
kṛtvā satkartavyā gurukartavyā mānayitavyā pūjayitavyā arcayitavyā
apacāyitavyā
puṣpairdhūpairgandhairmālyairvilepanaiścūrṇaiścīvarairvādyairvastraiśchatrairdhvajairghaṇṭābhiḥ
patākābhiḥ,
samantācca dīpamālābhiḥ,
bahuvidhābhiśca pūjābhiḥ| iyamasmākamantikādānanda anuśāsanī| tatkasya
hetoḥ ? atra hi
prajñāpāramitāyāṁ sarvajñajñānapariniṣpattirbhaviṣyati| tatkiṁ manyase
ānanda śāstā te tathāgataḥ
?
ānanda āha-śāstā me bhagavan,
śāstā me sugata| evamukte bhagavānāyuṣmantamānandametadavocat-śāstā te
ānanda tathāgataḥ| paricarito'smyānanda tvayā maitreṇa kāyakarmaṇā
manaāpena, maitreṇa
vākkarmaṇā manaāpena,
maitreṇa manaḥkarmaṇā manaāpena| tasmāttarhi ānanda yathaiva tvayā
mamaitarhi tiṣṭhato dhriyamāṇasya yāpayato'smin samucchraye prema ca
prasādaśca gauravaṁ ca kṛtam,
tathaiva tvayā ānanda mamātyayādasyāṁ prajñāpāramitāyāṁ kartavyam|
dvirapi trirapi te ānanda parīndāmi anuparīndāmi enāṁ prajñāpāramitām,
yatheyaṁ nāntardhīyeta,
yathā nāsyāṁ tvamanyaḥ puruṣaḥ syāḥ| yāvadānanda iyaṁ prajñāpāramitā
loke pracariṣyati,
tāvattathāgatastiṣṭhatīti veditavyam| tāvattathāgato dharmaṁ deśayatīti
veditavyam| avirahitāste ānanda sattvā buddhadarśanena dharmaśravaṇena
saṁghopasthānena ca veditavyam| tathāgatāntikāvacarāste ānanda sattvā
veditavyāḥ, ya enāṁ
prajñāpāramita śroṣyantyudgrahīṣyanti dhārayiṣyanti vācayiṣyanti
paryavāpsyanti pravartayiṣyanti deśayiṣyantyupadekṣyantyuddekṣyanti
svādhyāsyanti likhiṣyanti satkariṣyanti gurukariṣyanti mānayiṣyanti
pūjayiṣyantyarcayiṣyantyapacāyiṣyanti
puṣpadhūpagandhamālyavilepanacūrṇacīvaracchatradhvajaghaṇṭāpatākābhiḥ,
samantācca dīpamālābhiḥ,
bahuvidhābhiśca pūjābhiriti ||
idamavocadbhagavān āttamanāḥ|
te ca maitreyapramukhā bodhisattvā mahāsattvāḥ āyuṣmāṁśca
subhūtirāyuṣmāṁśca śāriputraḥ āyuṣmāṁścānandaḥ śakraśca devānāmindraḥ
sadevamānuṣāsuragaruḍagandharvaśca loko bhagavato
bhāṣitamabhyanandanniti ||
āryāṣṭasāhasrikāyāṁ
prajñāpāramitāyāṁ parīndanāparivarto nāma dvātriṁśattamaḥ ||
samāptā ceyaṁ bhagavatyā
āryāṣṭasāhasrikāyāḥ prajñāpāramitā sarvatathāgatajananī
bodhisattvapratyekajinaśrāvakāṇāṁ mātā,
dharmamudrā dharmolkā dharmanābhirdharmabherī dharmanetrī
dharmaratnanidhānam akṣayo dharmaḥ acintyādbhutadarśananakṣatramālā
sadevamānuṣāsuragandharvalokavanditā sarvasukhaheturiti ||
prajñāpāramitāṁ samyagudgṛhya paryavāpya ca dhārayitvā pravartya enāṁ
viharantu sadārthina iti ||
ye dharmā hetuprabhāvā
hetusteṣāṁ tathāgato hyavadat |
teṣāṁ ca yo nirodha
evaṁvādī mahāśramaṇaḥ ||
deyadharmo'yaṁ
pravaramahāyānayāyinyāḥ paramopāsikasaurājrasutalakṣmīdharasya| yadatra
puṇyaṁ tadbhavatvācāryopādhyāyamātāpitṛpūrvaṁgamaṁ kṛtvā
sakalasattvarāśeranuttarajñānāvāptaye iti ||