11
Stūpasaṁdarśanaparivartaḥ|
atha khalu bhagavataḥ
purastāttataḥ pṛthivīpradeśāt parṣanmadhyāt saptaratnamayaḥ
stūpo'bhyudgataḥ pañcayojanaśatānyuccaistvena tadanurūpeṇa ca pariṇāhena|
abhyudgamya vaihāyasamantarīkṣe samavātiṣṭhaccitro darśanīyaḥ pañcabhiḥ
puṣpagrahaṇīyavedikāsahasraiḥ svabhyalaṁkṛto bahutoraṇasahasraiḥ
pratimaṇḍitaḥ patākāvaijayantīsahasrābhiḥ pralambito
ratnadāmasahasrābhiḥ pralambitaḥ paṭṭaghaṇṭāsahasraiḥ pralambitaḥ
tamālapatracandanagandhaṁ pramuñcamānaḥ| tena ca gandhena sarvāvatīyaṁ
lokadhātuḥ saṁmūrcchitābhūt| chatrāvalī cāsya
yāvaccāturmahārājakāyikadevabhavanāni samucchritābhūt saptaratnamayī,
tadyathā-suvarṇasya rūpyasya vaiḍūryasya musāragalvasyāśmagarbhasya
lohitamukteḥ karketanasya| tasmiṁśca stūpe trāyastriṁśatkāyikā devaputrā
divyairmāndāravamahāmāndāravaiḥ puṣpaistaṁ ratnastūpamavakiranti
adhyavakiranti abhiprakiranti| tasmācca ratnastūpādevaṁrūpaḥ śabdo
niścarati sma-sādhu sādhu bhagavan śākyamune| subhāṣitaste'yaṁ
saddharmapuṇḍarīko dharmaparyāyaḥ| evametat bhagavan,
evametat sugata||
atha khalu tāścatasraḥ
parṣadastaṁ mahāntaṁ ratnastūpaṁ dṛṣṭvā vaihāyasamantarīkṣe sthitaṁ
saṁjātaharṣāḥ prītiprāmodyaprasādaprāptāḥ tasyāṁ velāyāmutthāya
āsanebhyo'ñjaliṁ pragṛhyāvasthitāḥ||
atha khalu tasyāṁ velāyāṁ
mahāpratibhāno nāma bodhisattvo mahāsattvaḥ sadevamānuṣāsuraṁ lokaṁ
kautūhalaprāptaṁ viditvā bhagavantametadavocat-ko bhagavan hetuḥ,
kaḥ pratyayaḥ,
asyaivaṁrūpasya mahāratnastūpasya loke prādurbhāvāya?
ko vā bhagavan asmānmahāratnastūpādevaṁrūpaṁ śabdaṁ niścārayati?
evamukte bhagavān mahāpratibhānaṁ bodhisattvaṁ
mahāsattvametadavocat-asmin mahāpratibhāna mahāratnastūpe
tathāgatasyātmabhāvastiṣṭhati ekaghanaḥ| tasyaiṣa stūpaḥ| sa eṣa śabdaṁ
niścārayati| asti mahāpratibhāna adhastāyāṁ diśi asaṁkhyeyāni
lokadhātukoṭīnayutaśatasahasrāṇyatikramya ratnaviśuddhā nāma lokadhātuḥ|
tasyāṁ prabhūtaratno nāma tathāgato'rhan samyaksaṁbuddho'bhūt|
tasyaitadbhagavataḥ purvapraṇidhānamabhūt-ahaṁ khalu pūrvaṁ
bodhisattvacaryāṁ caramāṇo na tāvanniryāto'nuttarāyāṁ samyaksaṁbodhau,
yāvanmayāyaṁ saddharmapuṇḍarīko dharmaparyāyo bodhisattvāvavādo na
śruto'bhūt|
yadā tu mayā ayaṁ
saddharmapuṇḍarīko dharmaparyāyaḥ śrutaḥ,
tadā paścādahaṁ pariniṣpanno'bhūvamanuttarāyāṁ samyaksaṁbodhau| tena
khalu punarmahāpratibhāna bhagavatā prabhūtaratnena tathāgatenārhatā
samyaksaṁbuddhena parinirvāṇakālasamaye sadevakasya lokasya samārakasya
sabrahmakasya saśramaṇabrāhmaṇikāyāḥ prajāyāḥ purastādevamārocitam-mama
khalu bhikṣavaḥ parinirvṛtasya asya tathāgatātmabhāvavigrahasya eko
mahāratnastūpaḥ kartavyaḥ| śeṣāḥ punaḥ stūpā mamoddiśya kartavyāḥ| tasya
khalu punarmahāpratibhāna bhagavataḥ prabhūtaratnasya tathāgatasyārhataḥ
samyaksaṁbuddhasyaitadadhiṣṭhānamabhūt-ayaṁ mama stūpo daśasu dikṣu
sarvalokadhātuṣu yeṣu buddhakṣetreṣvayaṁ saddharmapuṇḍarīko
dharmaparyāyaḥ saṁprakāśyeta,
teṣu teṣvayaṁ mamātmabhāvavigrahastūpaḥ samabhyudgacchet|
taistairbuddhairbhagavadbhirasmin saddharmapuṇḍarīke dharmaparyāye
bhāṣyamāṇe parṣanmaṇḍalasyopari vaihāyasaṁ tiṣṭhet| teṣāṁ ca buddhānāṁ
bhagavatāmimaṁ saddharmapuṇḍarīkaṁ dharmaparyāyaṁ bhāṣamāṇānāmayaṁ
mamātmabhāvavigrahastūpaḥ sādhukāraṁ dadyāt| tadayaṁ mahāpratibhāna
tasya bhagavataḥ prabhūtaratnasya tathāgatasyārhataḥ samyaksaṁbuddhasya
śarīrastūpaḥ| asyāṁ sahāyāṁ lokadhātau asmin saddharmapuṇḍarīke
dharmaparyāye mayā bhāṣyamāṇe'smāt parṣanmaṇḍalamadhyādabhyudgamya
uparyantarīkṣe vaihāyasaṁ sthitvā sādhukāraṁ dadāti sma||
atha khalu mahāpratibhāno
bodhisattvo mahāsattvo bhagavantametadavocat-paśyāma vayaṁ bhagavan etaṁ
tathāgatavigrahaṁ bhagavato'nubhāvena| evamukte bhagavān mahāpratibhānaṁ
bodhisattvaṁ mahāsattvametadavocat-tasya khalu punarmahāpratibhāna
bhagavataḥ prabhūtaratnasya tathāgatasyārhataḥ samyaksaṁbuddhasya
praṇidhānaṁ gurukamabhūt| etadasya praṇidhānam-yadā khalvanyeṣu
buddhakṣetreṣu buddhā bhagavanta imaṁ saddharmapuṇḍarīkaṁ dharmaparyāyaṁ
bhāṣeyuḥ, tadāyaṁ
mamātmabhāvavigrahastūpo'sya saddharmapuṇḍarīkasya dharmaparyāyasya
śravaṇāya gacchet tathāgatānāmantikam| yadā punaste buddhā bhagavanto
mamātmabhāvavigrahamuddhāṭya darśayitukāmā bhaveyuścatasṛṇāṁ parṣadām,
atha taistathāgatairdaśasu dikṣvanyonyeṣu buddhakṣetreṣu ya
ātmabhāvanirmitāstathāgatavigrahā anyānyanāmadheyāḥ,
teṣu teṣu buddhakṣetreṣu sattvānāṁ dharmaṁ deśayanti,
tān sarvān saṁnipātya tairātmabhāvanirmitaistathāgatavigrahaiḥ sārdhaṁ
paścādayaṁ mamātmabhāvavigrahastūpaḥ samuddhāṭya
upadarśayitavyaścatasṛṇāṁ parṣadām| tanmayāpi mahāpratibhāna
bahavastathāgatavigrahā nirmitāḥ,
ye daśasu dikṣvanyonyeṣu buddhakṣetreṣu lokadhātusahasreṣu sattvānāṁ
dharmaṁ deśayanti| te sarve khalvihānayitavyā bhaviṣyanti||
atha khalu mahāpratibhāno
bodhisattvo mahāsattvo bhagavantametadavocat-tānapi tāvad
bhagavaṁstathāgatātmabhāvāṁstathāgatanirmitān sarvān vandāmahai||
atha khalu bhagavāṁstasyāṁ
velāyāmūrṇākośādraśmiṁ prāmuñcat,
yayā raśmyā samanantarapramuktayā pūrvasyāṁ diśi pañcāśatsu
gaṅgānadīvālukāsameṣu lokadhātukoṭīnayutaśatasahasreṣu ye buddhā
bhagavanto viharanti sma,
te sarve saṁdṛśyante sma| tāni ca buddhakṣetrāṇi sphaṭikamayāni
saṁdṛśyante sma,
ratnavṛkṣaiśca citrāṇi saṁdṛśyante sma,
dūṣyapaṭṭadāmasamalaṁkṛtāni bahubodhisattvaśatasahasraparipūrṇāni
vitānavitatāni saptaratnahemajālapraticchannāni| teṣu teṣu buddhā
bhagavanto madhureṇa valgunā svareṇa sattvānāṁ dharmaṁ deśayamānāḥ
saṁdṛśyante sma| bodhisattvaśatasahasraiśca paripūrṇāni tāni
buddhakṣetrāṇi saṁdṛśyante sma| evaṁ pūrvadakṣiṇasyāṁ diśi| evaṁ
dakṣiṇasyāṁ diśi| evaṁ dakṣiṇapaścimāyāṁ diśi| evaṁ paścimāyāṁ diśi|
evaṁ paścimottarāyāṁ diśi| evamuttarāyāṁ diśi| evamuttarapūrvasyāṁ diśi|
evamadhastāyāṁ diśi| evamūrdhvāyāṁ diśi| evaṁ samantāddaśasu dikṣu
ekaikasyāṁ diśi bahūni gaṅgānadīvālukopamāni
buddhakṣetrakoṭīnayutaśatasahasrāṇi bahuṣu gaṅgānadīvālukopameṣu
lokadhātukoṭīnayutaśatasahasreṣu ye buddhā bhagavantastiṣṭhanti,
te sarve saṁdṛśyante sma||
atha khalu te daśasu dikṣu
tathāgatā arhantaḥ samyaksaṁbuddhāḥ svān svān
bodhisattvagaṇānāmantrayanti sma-gantavyaṁ khalu punaḥ kulaputrā
bhaviṣyati asmābhiḥ sahāṁ lokadhātum,
bhagavataḥ śākyamunestathāgatasyārhataḥ samyaksaṁbuddhasyāntikam,
prabhūtaratnasya tathāgatasyārhataḥ samyaksaṁbuddhasya
śarīrastūpavandanāya| atha khalu te buddhā bhagavantaḥ svaiḥ
svairupasthāyakaiḥ sārdhamātmadvitīyā ātmatṛtīyā imāṁ sahāṁ
lokadhātumāgacchanti sma| iti hi tasmin samaye iyaṁ sarvāvatī lokadhātū
ratnavṛkṣapratimaṇḍitābhūd vaiḍūryamayī saptaratnahemajālasaṁchannā
mahāratnagandhadhūpanadhūpitā māndāravamahāmāndāravapuṣpasaṁstīrṇā
kiṅkiṇījālālaṁkṛtā suvarṇasūtrāṣṭāpadanibaddhā
apagatagrāmanagaranigamajanapadarāṣṭrarājadhānī apagatakālaparvatā
apagatamucilindamahāmucilindaparvatā
apagatacakravālamahācakravālaparvatā apagatasumeruparvatā
apagatatadanyamahāparvatā apagatamahāsamudrā
apagatanadīmahānadīparisaṁsthitābhūt,
apagatedavamanuṣyāsurakāyā apagatanirayatiryagyoniyamalokā| iti hi
tasmin samaye ye'syāṁ sahāyāṁ lokadhātau ṣaḍgatyupapannāḥ sattvāḥ,
te sarve'nyeṣu lokadhātuṣūpanikṣiptā abhūvan,
sthāpayitvā ye tasyāṁ parṣadi saṁnipatitā abhūvan| atha khalu te buddhā
bhagavanta upasthāyakadvitīyā upasthāyakatṛtīyā imāṁ sahāṁ
lokadhātumāgacchanti sma| āgatāgatāśca te tathāgatā ratnavṛkṣamūle
siṁhāsanamupaniśritya viharanti sma| ekaikaśca ratnavṛkṣaḥ
pañcayojanaśatānyuccaistvenābhūt anupūrvaśākhāpatrapalāśapariṇāhaḥ
puṣpaphalapratimaṇḍitaḥ| ekaikasmiṁśca ratnavṛkṣamūle siṁhāsanaṁ
prajñaptamabhūt pañcayojanaśatānyuccaistvena mahāratnapratimaṇḍitam|
tasminnekaikastathāgataḥ paryaṅkaṁ baddhvā niṣaṇṇo'bhūt| anena paryāyeṇa
sarvasyāṁ trisāhasramahāsāhasrāyāṁ lokadhātau sarvaratnavṛkṣamūleṣu
tathāgatāḥ paryaṅkaṁ baddhvā niṣaṇṇā abhūvan||
tena khalu punaḥ samayena
iyaṁ trisāhasramahāsāhasrī lokadhātustathāgataparipūrṇābhūt| na tāvad
bhagavataḥ śākyamunestathāgatasyātmabhāvanirmitā ekasmādapi digbhāgāt
sarva āgatā abhūvan| atha khalu punarbhagavān śākyamunistathāgato'rhan
samyaksaṁbuddhasteṣāṁ tathāgatavigrahāṇāmāgatāgatānāmavakāśaṁ nirmimīte
sma| samantādaṣṭabhyo digbhyo viṁśatibuddhakṣetrakoṭīnayutaśatasahasrāṇi
sarvāṇi vaiḍūryamayāni saptaratnahemajālasaṁchannāni
kiṅkiṇījālālaṁkṛtāni māndāravamahāmāndāravapuṣpasaṁstīrṇāni
divyavitānavitatāni divyapuṣpadāmābhipralambitāni
divyagandhadhūpanadhūpitāni| sarvāṇi ca tāni
viṁśatibuddhakṣetrakoṭīnayutaśatasahasrāṇyapagatagrāmanagaranigamajanapadarāṣṭrarājadhānīni
apagatakālaparvatāni apagatamucilindamahāmucilindaparvatāni
apagatacakravālamahācakravālaparvatāni apagatasumeruparvatāni
apagatatadanyamahāparvatāni apagatamahāsamudrāṇi apagatanadīmahānadīni
parisaṁsthāpayati apagatadevamanuṣyāsurakāyāni
apagatanirayatiryagyoniyamalokāni| tāni ca sarvāṇi bahubuddhakṣetrāṇi
ekameva buddhakṣetramekameva pṛthivīpradeśaṁ parisaṁsthāpayāmāsa samaṁ
ramaṇīyaṁ saptaratnamayaiśca vṛkṣaiścitritam| teṣāṁ ca ratnavṛkṣāṇāṁ
pañcayojanaśatānyārohapariṇāho'nupūrvaśākhāpatrapuṣpaphalopetaḥ|
sarvasmiṁśca ratnavṛkṣamūle pañcayojanaśatānyārohapariṇāhaṁ
divyaratnamayaṁ vicitraṁ darśanīyaṁ siṁhāsanaṁ prajñaptamabhūt| teṣu
ratnavṛkṣamūleṣvāgatāgatāstathāgatāḥ siṁhāsaneṣu paryaṅkaṁ baddhvā
niṣīdante sma| anena paryāyeṇa punaraparāṇi
viṁśatilokadhātukoṭīnayutaśatasahasrāṇyekaikasyāṁ diśi
śākyamunistathāgataḥ pariśodhayati sma teṣāṁ
tathāgatānāmāgatānāmavakāśārtham|
tānyapi
viṁśatilokadhātukoṭīnayutaśatasahasrāṇyaikaikasyāṁ diśi
apagatagrāmanagaranigamajanapadarāṣṭrarājadhānīni apagatakālaparvatāni
apagatamucilindamahāmucilindaparvatāni
apagatacakravālamahācakravālaparvatāni apagatasumeruparvatāni
apagatatadanyamahāparvatāni apagatamahāsamudrāṇi apagatanadīmahānadīni
parisaṁsthāpayati apagatadevamanuṣyāsurakāyāni
apagatanirayatiryagyoniyamalokāni| te ca sarvasattvā anyeṣu
lokadhātuṣūpanikṣiptāḥ| tānyapi buddhakṣetrāṇi vaiḍūryamayāni
saptaratnahemajālapraticchannāni kiṅkiṇījālālaṁkṛtāni
māndāravamahāmāndāravapuṣpasaṁstīrṇāni divyavitānavitatāni
divyapuṣpadāmābhipralambitāni divyagandhadhūpanadhūpitāni
ratnavṛkṣopaśobhitāni| sarve ca te ratnavṛkṣāḥ pañcayojanaśatapramāṇāḥ|
pañcayojanapramāṇāni ca siṁhāsanānyabhinirmitāni| tataste tathāgatā
niṣīdante sma pṛthak pṛthak siṁhāsaneṣu ratnavṛkṣamūleṣu paryaṅkaṁ
baddhvā||
tena khalu punaḥ samayena
bhagavatā śākyamuninā ye nirmitāstathāgatāḥ pūrvasyāṁ diśi sattvānāṁ
dharmaṁ deśayanti sma gaṅgānadīvālukopameṣu
buddhakṣetrakoṭīnayutaśatasahasreṣu,
te sarve samāgatā daśabhyo digbhyaḥ| te cāgatā aṣṭāsu dikṣu niṣaṇṇā
abhūvan| tena khalu punaḥ samayenaikaikasyāṁ diśi
triṁśallokadhātukoṭīśatasahasrāṇyaṣṭabhyo digbhyaḥ
samantāttaistathāgatairākrāntā abhūvan| atha khalu te tathāgatāḥ sveṣu
sveṣu siṁhāsaneṣūpaviṣṭāḥ svān svānupasthāyakān saṁpreṣayanti sma
bhagavataḥ śākyamunerantikam| ratnapuṣpapuṭān datvā evaṁ vadanti
sma-gacchata yūyaṁ gṛdhrakūṭaṁ parvatam| gatvā ca punastasmiṁstaṁ
bhagavantaṁ śākyamuniṁ tathāgatamarhantaṁ samyaksaṁbuddhaṁ vanditvā
asmadvacanādalpābādhatāṁ mandaglānatāṁ ca balaṁ ca sparśavihāratāṁ ca
paripṛcchadhvaṁ sārdhaṁ bodhisattvagaṇena śrāvakagaṇena| anena ca
ratnarāśinā abhyavakiradhvam,
evaṁ ca vadadhvam-dadāti khalu punarbhagavāṁstathāgataśchandamasya
mahāratnastūpasya samuddhāṭane| evaṁ te tathāgatāḥ sarve svān
svānupasthāyakān saṁpreṣayāmāsuḥ||
atha khalu bhagavān
śākyamunistathāgatastasyāṁ velāyāṁ svānnirmitānaśeṣataḥ samāgatān
viditvā, pṛthakpṛthak
siṁhāsaneṣu niṣaṇṇāṁśca viditvā,
tāṁścopasthāyakāṁsteṣāṁ tathāgatānāmarhatāṁ samyaksaṁbuddhānāmāgatān
viditvā, chandaṁ ca
taistathāgatairarhadbhiḥ samyaksaṁbuddhairārocitaṁ viditvā,
tasyāṁ velāyāṁ svakāddharmāsanādutthāya vaihāyasamantarīkṣe'tiṣṭhat|
tāśca sarvāścatasraḥ pariṣadaḥ utthāyāsanebhyo'ñjalīḥ parigṛhya
bhagavato mukhamullokayantyastasthuḥ| atha khalu bhagavāṁstaṁ mahāntaṁ
ratnastūpaṁ vaihāyasaṁ sthitaṁ dakṣiṇayā hastāṅgulyā madhye
samuddhāṭayati sma| samuddhāṭya ca dve bhittī pravisārayati sma|
tadyathāpi nāma mahānagaradvāreṣu mahākapāṭasaṁpuṭāvargalavimuktau
pravisāryete, evameva
bhagavāṁstaṁ mahāntaṁ ratnastūpaṁ vaihāyasaṁ sthitaṁ dakṣiṇayā
hastāṅgulyā madhye samuddhāṭya apāvṛṇoti sma| samanantaravivṛtasya khalu
punastasya mahāratnastūpasya,
atha khalu bhagavān prabhūtaratnastathāgato'rhan samyaksaṁbuddhaḥ
siṁhāsanopaviṣṭaḥ paryaṅkaṁ baddvā pariśuṣkagātraḥ saṁghaṭitakāyo yathā
samādhisamāpannastathā saṁdṛśyate sma| evaṁ ca vācamabhāṣata-sādhu sādhu
bhagavan śākyamune| subhāṣitaste'yaṁ saddharmapuṇḍarīko dharmaparyāyaḥ|
sādhu khalu punastvaṁ bhagavan śākyamune yastvamimaṁ saddharmapuṇḍarīkaṁ
dharmaparyāyaṁ parṣanmadhye bhāṣase| asyaivāhaṁ bhagavan
saddharmapuṇḍarīkasya dharmaparyāyasya śravaṇāyehāgataḥ||
atha khalu tāścatasraḥ
parṣadastaṁ bhagavantaṁ prabhūtaratnaṁ tathāgatamarhantaṁ
samyaksaṁbuddhaṁ bahukalpakoṭīnayutaśatasahasraparinirvṛtaṁ tathā
bhāṣamāṇaṁ dṛṣṭvā āścaryaprāptā adbhutaprāptā abhūvan| tasyāṁ velāyāṁ
taṁ bhagavantaṁ prabhūtaratnaṁ tathāgatamarhantaṁ samyaksaṁbuddha taṁ ca
bhagavantaṁ śākyamuniṁ tathāgatamarhantaṁ samyaksaṁbuddhaṁ
divyamānuṣyakai ratnarāśibhirabhyavakiranti sma| atha khalu bhagavān
prabhūtaratnastathāgato'rhan samyaksaṁbuddho bhagavataḥ
śākyamunestathāgatasyārhataḥ samyaksaṁbuddhasya tasminneva
siṁhāsane'rdhāsanamadāsīt,
tasyaiva mahāratnastūpābhyantare,
evaṁ ca vadati-ihaiva bhagavān śākyamunistathāgato niṣīdatu| atha khalu
bhagavān śākyamunistathāgatastasminnardhāsane niṣasāda tenaiva
tathāgatena sārdham| ubhau ca tau tathāgatau tasya mahāratnastūpasya
madhye siṁhāsanopaviṣṭau vaihāyasamantarīkṣasthau saṁdṛśyete||
atha khalu tāsāṁ catasṛṇāṁ
parṣadāmetadabhavat-dūrasthā vayamābhyāṁ tathāgatābhyām| yannūnaṁ
vayamapi tathāgatānubhāvena vaihāyasamabhyudgacchema iti| atha khalu
bhagavān śākyamunistathāgatastāsāṁ catasṛṇāṁ parṣadāṁ cetasaiva
cetaḥparivitarkamājñāya tasyāṁ velāyāmṛddhibalena tāścatasraḥ parṣado
vaihāyasamuparyantarīkṣe pratiṣṭhāpayati sma| atha khalu bhagavān
śākyamunistathāgatastasyāṁ velāyāṁ tāścatasraḥ parṣada āmantrayate
sma-ko bhikṣavo yuṣmākamutsahate tasyāṁ sahāyāṁ lokadhātau imaṁ
saddharmapuṇḍarīkaṁ dharmaparyāyaṁ saṁprakāśayitum?
ayaṁ sa kālaḥ, ayaṁ
sa samayaḥ| saṁmukhībhūtastathāgataḥ| parinirvāyitukābho
bhikṣavastathāgata imaṁ saddharmapuṇḍarīkaṁ dharmaparyāyamupanikṣipya||
atha khalu bhagavāṁstasyāṁ
velāyāmimā gāthā abhāṣata—
ayamāgato nirvṛtako maharṣī
ratanāmayaṁ stūpa praviśya
nāyakaḥ|
śravaṇārtha dharmasya imasya
bhikṣavaḥ
ko dharmahetorna janeta
vīryam||1||
bahukalpakoṭīparinirvṛto'pi
so nāma adyāpi śṛṇoti
dharmam|
tahiṁ tahiṁ gacchati
dharmahetoḥ
sudurlabho dharma
yamevarūpaḥ||2||
praṇidhānametasya
vināyakasya
niṣevitaṁ pūrvabhave
yadāsīt|
parinirvṛto'pī imu
sarvalokaṁ
paryeṣatī
sarvadaśaddiśāsu||3||
ime ca sarve mama ātmabhāvāḥ
sahasrakoṭyo yatha
gaṅgavālikāḥ|
te dharmakṛtyasya kṛtena
āgatāḥ
parinirvṛtaṁ ca imu draṣṭu
nātham||4||
choritva kṣetrāṇi
svakasvakāni
tatha śrāvakāntara marutaśca
sarvān|
saddharmasaṁrakṣaṇahetu
sarve
kathaṁ ciraṁ tiṣṭhiya
dharmanetrī||5||
eteṣu buddhāna niṣīdanārthaṁ
bahulokadhātūna
sahasrakoṭyaḥ|
saṁkrāmitā me tatha
sarvasattvā
ṛddhībalena
pariśodhitāśca||6||
etādṛśī utsukatā iyaṁ me
kathaṁ prakāśediya
dharmanetrī|
ime ca buddhā sthita
aprameyā
drumāṇa mūle yatha
padmarāśiḥ||7||
drumamūlakoṭīya analpakāyo
siṁhāsanasthehi vināyakehi|
śobhanti tiṣṭhanti ca
nityakālaṁ
hutāśaneneva
yathāndhakāram||8||
gandho manojño daśasū diśāsu
pravāyate lokavināyakānām|
yenā ime mūrcchita
sarvasattvā
vāte pravāte iha
nityakālam||9||
mayi nirvṛte yo etaṁ
dharmaparyāyu dhārayet|
kṣipraṁ vyāharatāṁ vācaṁ
lokanāthāna saṁmukham||10||
parinirvṛto hi saṁbuddhaḥ
prabhūtaratano muniḥ|
siṁhanādaṁ śruṇe tasya
vyavasāyaṁ karoti yaḥ||11||
ahaṁ dvitīyo bahavo ime ca
ye koṭiyo āgata nāyakānām|
vyavasāya śroṣyāmi jinasya
putrāt
yo utsaheddharmamimaṁ
prakāśitum||12||
ahaṁ ca tena bhavi pūjitaḥ
sadā
prabhūtaratnaśca jinaḥ
svayaṁbhūḥ|
yo gacchate diśavidiśāsu
nityaṁ
śravaṇāya dharmaṁ
imamevarūpam||13||
ime ca ye āgata lokanāthā
vicitritā yairiya śobhitā
bhūḥ|
teṣāṁ pi pūjā vipula
analpakā
kṛtā
bhavetsūtraprakāśanena||14||
ahaṁ ca dṛṣṭo iha āsanasmin
bhagavāṁśca yo'yaṁ sthitu
stūpamadhye|
ime ca anye bahulokanāthā
ye āgatāḥ
kṣetraśatairanekaiḥ||15||
cintetha kulaputrāho
sarvasatvānukampayā|
suduṣkaramidaṁ
sthānamutsahanti vināyakāḥ||16||
bahusūtrasahasrāṇi yathā
gaṅgāya vālikāḥ|
tāni kaścitprakāśeta na
tadbhavati duṣkaram||17||
sumeruṁ yaśca hastena
adhyālambitva muṣṭinā|
kṣipeta kṣetrakoṭīyo na
tadbhavati duṣkaram||18||
yaśca imāṁ trisāhasrīṁ
pādāṅguṣṭhena kampayet|
kṣipeta kṣetrakoṭīyo na
tadbhavati duṣkaram||19||
bhavāgre yaśca tiṣṭhitvā
dharmaṁ bhāṣennaro iha|
anyasūtrasahasrāṇi na
tadbhavati duṣkaram||20||
nirvṛtasmiṁstu lokendre
paścātkāle sudāruṇe|
ya idaṁ dhārayet sūtraṁ
bhāṣedvā tatsuduṣkaram||21||
ākāśadhātuṁ yaḥ
sarvāmekamuṣṭiṁ tu nikṣipet|
prakṣipitvā ca gaccheta na
tadbhavati duṣkaram||22||
yastu īdṛśakaṁ sūtraṁ
nirvṛtasmiṁstadā mayi|
paścātkāle likheccāpi idaṁ
bhavati duṣkaram||23||
pṛthivīdhātuṁ ca yaḥ sarvaṁ
nakhāgre saṁpraveśayet|
prakṣipitvā ca gaccheta
brahmalokaṁ pi āruhet||24||
na duṣkaraṁ hi so kuryānna
ca vīryasya tattakam|
taṁ duṣkaraṁ karitvāna
sarvalokasyihāgrataḥ||25||
ato'pi duṣkarataraṁ
nirvṛtasya tadā mama|
paścātkāle idaṁ sūtraṁ
vadeyā yo muhūrtakam||26||
na duṣkaramidaṁ loke
kalpadāhasmi yo naraḥ|
madhye
gacchedadahyantastṛṇabhāraṁ vaheta ca||27||
ato'pi duṣkarataraṁ
nirvṛtasya tadā mama|
dhārayitvā idaṁ
sūtramekasattvaṁ pi śrāvayet||28||
dharmaskandhasahasrāṇi
caturaśīti dhārayet|
sopadeśān yathāproktān
deśayet prāṇikoṭinām||29||
na hyetaṁ duṣkaraṁ bhoti
tasmin kālasmi bhikṣuṇām|
vinayecchrāvakān mahyaṁ
pañcābhijñāsu sthāpayet||30||
tasyedaṁ duṣkarataraṁ idaṁ
sūtraṁ ca dhārayet|
śraddadhedadhimucyedvā
bhāṣedvāpi punaḥ punaḥ||31||
koṭīsahasrān bahavaḥ
arhattve yo'pi sthāpayet|
ṣaḍabhijñān mahābhāgān yathā
gaṅgāya vālikāḥ||32||
ato bahutaraṁ karma karoti
sa narottamaḥ|
nirvṛtasya hi yo mahyaṁ
sūtraṁ dhārayate varam||33||
lokadhātusahasreṣu bahu me
dharma bhāṣitāḥ|
adyāpi cāhaṁ bhāṣāmi
buddhajñānasya kāraṇāt||34||
idaṁ tu sarvasūtreṣu
sūtramagraṁ pravucyate|
dhāreti yo idaṁ sūtraṁ sa
dhāre jinavigraham||35||
bhāṣadhvaṁ kulaputrāho
saṁmukhaṁ vastathāgataḥ|
ya utsahati vaḥ kaścit
paścātkālasmi dhāraṇam||36||
mahatpriyaṁ kṛtaṁ bhoti
lokanāthāna sarvaśaḥ|
durādhāramidaṁ sutraṁ
dhārayedyo muhūrtakam||37||
saṁvarṇitaśca so bhoti
lokanāthehi sarvadā|
śūraḥ śauṭīryavāṁścāpi
kṣiprābhijñaśca bodhaye||38||
dhurāvāhaśca so bhoti
lokanāthāna aurasaḥ|
dāntabhūmimanuprāptaḥ sūtraṁ
dhāreti yo idam||39||
cakṣubhūtaśca so bhoti loke
sāmaramānuṣe|
idaṁ sutraṁ prakāśitvā
nirvṛte naranāyake||40||
vandanīyaśca so bhoti
sarvasattvāna paṇḍitaḥ|
paścime kāli yo bhāṣet
sūtramekaṁ muhūrtakam||41||
atha khalu bhagavān kṛtsnaṁ
bodhisattvagaṇaṁ sasurāsuraṁ ca lokamāmantraya etadavocat-bhūtapūrvaṁ
bhikṣavo'tīte'dhvani ahamaprameyāsaṁkhyeyān kalpān saddharmapuṇḍarīkaṁ
sūtraṁ paryeṣitavānakhinno'viśrāntaḥ| pūrvaṁ ca ahamanekān kalpānanekāni
kalpaśatasahasrāṇi rājābhūvamanuttarāyāṁ samyaksaṁbodhau kṛtapraṇidhānaḥ|
na ca me cittavyāvṛttirabhūt| ṣaṇṇāṁ ca pāramitānāṁ paripūryā
udyukto'bhūvamaprameyadānapradaḥ
suvarṇamaṇimuktāvaidūryaśaṅkhaśilāpravālajātarūparajatāśmagarbham
usāragalvalohitamuktāgrāmanagaranigamajanapadarāṣṭrarājadhānībhāryāputraduhitṛdāsīdāsakarma-
karapauruṣeyahastyaśvarathaṁ
yāvadātmaśarīraparityāgī karacaraṇaśirottamāṅgapratyaṅgajīvitadātā| na
ca me kadācidāgrahacittamutpannam| tena ca samayena ayaṁ loko
dīrghāyurabhat| anekavarṣaśatasahasrajīvitena ca ahaṁ kālena dharmārthaṁ
rājyaṁ kāritavān, na
viṣayārtham| so'haṁ jyeṣṭhaṁ kumāraṁ rājye'bhiṣicya caturdiśaṁ
jyeṣṭhadharmagaveṣaṇāya udyukto'bhūvam| evaṁ ghaṇṭayā ghoṣāpayitavān-yo
me jyeṣṭhaṁ dharmamanupradāsyati,
arthaṁ cākhyāsyati,
tasyāhaṁ dāso bhūyāsam| tena ca kālena ṛṣirabhūt| sa māmetadavocat-asti
mahārāja saddharmapuṇḍarīkaṁ nāma sutraṁ jyeṣṭhadharmanirdeśakam|
tadyadi dāsyamabhyupagacchasi,
tataste'haṁ taṁ dharmaṁ śrāvayiṣyāmi| so'haṁ śrutvā tasyarṣervacanaṁ
hṛṣṭastuṣṭa udagra āttamanāḥ prītisaumanasyajāto yena sa ṛṣistenopeyivān|
upetyāvocat-yatte dāsena karma karaṇīyaṁ tatkaromi| so'haṁ
tasyarṣerdāsabhāvamabhyupetya tṛṇakāṣṭhapānīyakandamūlaphalādīni
preṣyakarmāṇi kṛtavān,
yāvad dvārādhyakṣo'pyahamāsam| divasaṁ caivaṁvidhaṁ karma kṛtvā rātrau
śayānasya mañcake pādān dhārayāmi| na ca me kāyaklamo na cetasi
klamo'bhūt| evaṁ ca me kurvataḥ paripūrṇaṁ varṣāsahasraṁ gatam||
atha khalu bhagavāṁstasyāṁ
velāyāmetamevārthaṁ paridyotayannimā gāthā abhāṣata—
kalpānatītān samanusmarāmi
yadāhamāsaṁ dhārmiko
dharmarājā|
rājyaṁ came dharmahetoḥ
kṛtaṁ ta-
nna ca
kāmahetorjyeṣṭhadharmahetoḥ||42||
caturdiśaṁ me kṛta
ghoṣaṇo'yaṁ
dharmaṁ vadedyastasya dāsyaṁ
vrajeyam|
āsīdṛṣistena kālena dhīmān
sūtrasya saddharmanāmnaḥ
pravaktāḥ||43||
sa māmavocadyadi te
dharmakāṅkṣā
upehi dāsyaṁ dharmamataḥ
pravakṣye|
tuṣṭaścāhaṁ vacanaṁ taṁ
niśāmya
karmākaroddāsayogyaṁ tadā
yam||44||
na kāyacittaklamatho
spṛśenmāṁ
saddharmahetordāsamāgatasya|
praṇidhistadā me bhavi
sattvaheto-
rnātmānamuddiśya na
kāmahetoḥ||45||
sa rāja āsīttadā abdhavīryo
ananyakarmāṇi daśaddiśāsu|
paripūrṇa kalpāna
sahasrakhinno
yāvatsūtraṁ labdhavān
dharmanāmam||46||
tatkiṁ manyadhve bhikṣavaḥ
anyaḥ sa tena kālena tena samayena rājābhūt?
na khalu punarevaṁ draṣṭavyam| tatkasya hetoḥ?
ahaṁ sa tena kālena tena samayena rājābhūvam| syātkhalu
punarbhikṣavo'nyaḥ sa tena kālena tena samayenarṣirabhūt?
na khalu punarevaṁ draṣṭavyam| ayameva sa tena kālena tena samayena
devadatto bhikṣurṛṣirabhut| devadatto hi bhikṣavo mama kalyāṇamitram|
devadattameva cāgamya mayā ṣaṭū pāramitāḥ paripūritāḥ,
mahāmaitrī mahākaruṇā mahāmuditā mahopekṣā|
dvātriṁśanmahāpuruṣalakṣaṇāni aśītyanuvyañjanāni suvarṇavarṇacchavitā
daśa balāni catvāri vaiśāradyāni catvāri saṁgrahavastūni
aṣṭādaśāveṇikabuddhadharmā maharddhibalatā daśadiksattvanistāraṇatā,
sarvametaddevadattamāgasya| ārocayāmi vo bhikṣavaḥ,
prativedayāmi- eṣa devadatto bhikṣuranāgate'dhvani aprameyaiḥ
kalpairasaṁkhyeyairdevarājo nāma tathāgato'rhan samyaksaṁbuddho
bhaviṣyati vidyācaraṇasaṁpannaḥ sugato lokavidanuttaraḥ
puruṣadamyasārathiḥ śāstā devānāṁ ca manuṣyāṇāṁ ca bhagavān
devasopānāyāṁ lokadhātau| devarājasya khalu punarbhikṣavastathāgatasya
viṁśatyantarakalpānāyuṣpramāṇaṁ bhaviṣyati| vistareṇa ca dharmaṁ
deśayiṣyati| gaṅgānadīvālukāsamāśca sattvāḥ sarvakleśaprahāṇādarhattvaṁ
sākṣātkariṣyanti|
aneke ca sattvāḥ
pratyekabodhau cittamutpādayiṣyanti| gaṅgānadīvālukāsamāśca sattvā
anuttarāyāṁ samyaksaṁbodhau cittamutpādayiṣyanti,
avaivartikakṣāntipratilabdhāśca bhaviṣyanti| devarājasya khalu
punarbhikṣavastathāgatasya parinirvṛtasya viṁśatyantarakalpān saddharmaḥ
sthāsyati| na ca śarīraṁ dhātubhedena bhetsyate| ekaghanaṁ cāsya śarīraṁ
bhaviṣyati saptaratnastūpaṁ praviṣṭam| sa ca stūpaḥ
ṣaṣṭiyojanaśatānyuccaistvena bhaviṣyati,
catvāriṁśadyojanānyāyāmena| sarve ca tatra devamanuṣyāḥ pūjāṁ kariṣyanti
puṣpadhūpagandhamālyavilepanacūrṇacīvaracchatradhvajapatākābhirgāthābhiḥ|
tena cābhiṣṭoṣyanti| ye ca taṁ stūpaṁ pradakṣiṇaṁ kariṣyanti praṇāmaṁ vā,
teṣāṁ kecidagraphalamarhattvaṁ sākṣātkariṣyanti kecit
pratyekabodhimanuprāpsyante acintyācāścāprameyā devamanuṣyā anuttarāyāṁ
samyaksaṁbodhau cittānyutpādya avinivartanīyā bhaviṣyanti||
atha khalu bhagavān punareva
bhikṣusaṁghamāmantrayate sma-yaḥ kaścit bhikṣavo'nāgate'dhvani kulaputro
vā kuladuhitā vā imaṁ saddharmapuṇḍarīkaṁ sūtraparivartaṁ śroṣyati,
śrutvā ca na kāṅkṣiṣyati na vicikitsiṣyati,
viśuddhacittaścādhimokṣyate,
tena tisṛṇāṁ durgatīnāṁ dvāraṁ pithitaṁ bhaviṣyati
narakatiryagyoniyamalokopapattiṣu na patiṣyati|
daśadigbuddhakṣetropapannaścedameva sūtraṁ janmani janmani śroṣyati|
devamanuṣyalokopapannasya cāsya viśiṣṭasthānaprāptirbhaviṣyati|
yasmiṁśca buddhakṣetra upapatsyate,
tasminnaupapāduke saptaratnamaye padme upapatsyate tathāgatasya
saṁmukham||
atha khalu tasyāṁ
velāyāmadhastāddiśaḥ prabhūtaratnasya tathāgatasya buddhakṣetrādāgataḥ
prajñākūṭo nāma bodhisattvaḥ| sa taṁ prabhūtaratnaṁ
tathāgatametadavocat-gacchāmo bhagavan svakaṁ buddhakṣetram| atha khalu
bhagavān śākyamunistathāgataḥ prajñākūṭaṁ
bodhisattvametadavocat-muhūrtaṁ tāvat kulaputra āgamayasva yāvanmadīyena
bodhisattvena mañjuśriyā kumārabhūtena sārdhaṁ kaṁcideva
dharmaviniścayaṁ kṛtvā paścāt svakaṁ buddhakṣetraṁ gamiṣyasi| atha khalu
tasyāṁ velāyāṁ mañjuśrīḥ kumārabhūtaḥ sahasrapatre padme
śakaṭacakrapramāṇamātre niṣaṇṇo'nekabodhisattvaparivṛtaḥ puraskṛtaḥ
samudramadhyāt sāgaranāgarājabhavanādabhyudgamya upari vaihāyasaṁ
khagapathena gṛdhrakūṭe parvate bhagavato'ntikamupasaṁkrāntaḥ| atha
mañjuśrīḥ kumārabhūtaḥ padmādavatīrya bhagavataḥ śākyamuneḥ
prabhūtaratnasya ca tathāgatasya pādau śirasābhivanditvā yena prajñākūṭo
bodhisattvastenopasaṁkrāntaḥ| upasaṁkramya prajñākūṭena bodhisattvena
sārdhaṁ saṁmukhaṁ saṁmodanīṁ saṁrañjanīṁ vividhāṁ kathāmupasaṁgṛhya
ekānte nyaṣīdat| atha khalu prajñākūṭo bodhisattvo mañjuśriyaṁ
kumārabhūtametadavocat-samudramadhyagatena tvayā mañjuśrīḥ kiyān
sattvadhāturvinītaḥ?
mañjuśrīrāha-anekānyaprameyāṇyasaṁkhyeyāni sattvāni vinītāni|
tāvadaprameyāṇyasaṁkhyeyāni yāvadvācā na śakyaṁ vijñāpayituṁ cittena vā
cintayitum|
muhūrtaṁ tāvat kulaputra
āgamayasva yāvat pūrvanimittaṁ drakṣyasi| samanantarabhāṣitā ceyaṁ
mañjuśriyā kumārabhūtena vāk,
tasyāṁ velāyāmanekāni padmasahasrāṇi samudramadhyādabhyudgatāni upari
vaihāyasam| teṣu ca padmeṣvanekāni bodhisattvasahasrāṇi saṁniṣaṇṇāni|
atha te bodhisattvāstenaiva khagapathena yena gṛdhrakūṭaḥ
parvatastenopasaṁkrāntāḥ| upasaṁkramya tataścopari vaihāyasaṁ sthitāḥ
saṁdṛśyante sma| sarve ca te mañjuśriyā kumārabhūtena vinītā anuttarāyāṁ
samyaksaṁbodhau| tatra ye bodhisattvā mahāyānasaṁprasthitāḥ
pūrvamabhūvan, te
mahāyānaguṇān ṣaṭ pāramitāḥ saṁvarṇayanti| ye śrāvakapūrvā
bodhisattvāste śrāvakayānameva saṁvarṇayanti| sarve ca te sarvadharmān
śūnyāniti saṁjānanti sma,
mahāyānagūṇāṁśca| atha khalu mañjuśrīḥ kumārabhūtaḥ prajñākūṭaṁ
bodhisattvametadavocat-sarvo'yaṁ kulaputra mayā samudramadhyagatena
sattvavinayaḥ kṛtaḥ| sa cāyaṁ saṁdṛśyate| atha khalu prajñākūṭo
bodhisattvo mañjuśriyaṁ kumārabhūtaṁ gāthābhigītena paripṛcchati—
mahābhadra prajñayā
sūranāman
asaṁkhyeyā ye
vinītāstvayādya|
sattvā amī kasya cāyaṁ
prabhāva-
stadbūhi pṛṣṭo naradeva
tvametat||47||
kaṁ vā dharmaṁ deśitavānasi
tvaṁ
kiṁ vā sūtraṁ
bodhimārgopadeśam|
yacchrutvāmī bodhaye
jātacittāḥ
sarvajñatve niścitaṁ
labdhagādhāḥ||48||
mañjuśrīrāha-samudramadhye
saddharmapuṇḍarīkaṁ sūtraṁ bhāṣitavān,
na cānyat| prajñākūṭa āha-idaṁ sūtraṁ gambhīraṁ sūkṣmaṁ durdṛśam,
na cānena sutreṇa kiṁcidanyat sūtraṁ samamasti| asti kaścit sattvo ya
idaṁ sūtraratnaṁ satkuryādavaboddhumanuttarāṁ
samyaksaṁbodhimabhisaṁboddhum?
mañjuśrīrāha-asti kulaputra sāgarasya nāgarājño duhitā aṣṭavarṣā jātyā
mahāprajñā tīkṣṇendriyā jñānapūrvaṁgamena kāyavāṅmanaskarmaṇā
samanvāgatā sarvatathāgatabhāṣitavyañjanārthodgrahaṇe dhāraṇīpratilabdhā
sarvadharmasattvasamādhānasamādhisahasraikakṣaṇapratilābhinī|
bodhicittāvinivartinī vistīrṇapraṇidhānā sarvasattveṣvātmapremānugatā
guṇotpādane ca samarthā| na ca tebhyaḥ parihīyate| smitamukhī paramayā
śubhavarṇapuṣkalatayā samanvāgatā maitracittā karuṇāṁ ca vācaṁ bhāṣate|
sā samyaksaṁbodhimabhisaṁboddhuṁ samarthāṁ| prajñākūṭo bodhisattva
āha-dṛṣṭo mayā bhagavān śākyamunistathāgato bodhāya ghaṭamāno
bodhisattvabhūto'nekāni puṇyāni kṛtavān| anekāni ca kalpasahasrāṇi na
kadācid vīryaṁ sraṁsitavān| trisāhasramahāsāhasrāyāṁ lokadhātau nāsti
kaścidantaśaḥ sarṣapamātro'pi pṛthivīpradeśaḥ yatrānena śarīraṁ na
nikṣiptaṁ sattvahitahetoḥ| paścād bodhimabhisaṁbuddha| ka evaṁ
śraddadhyāt, yadanayā
śakyaṁ muhūrtena anuttarāṁ samyaksaṁbodhimabhisaṁboddhum?
atha khalu tasyāṁ velāyāṁ
sāgaranāgarājaduhitā agrataḥ sthitā saṁdṛśyate sma| sā bhagavataḥ pādau
śirasābhivandya ekānte'sthāt| tasyāṁ velāyāmimā gāthā abhāṣata—
puṇyaṁ puṇyaṁ gabhīraṁ ca
diśaḥ sphurati sarvaśaḥ|
sūkṣmaṁ śarīraṁ
dvātriṁśallakṣaṇaiḥ samalaṁkṛtam||49||
anuvyajanayuktaṁ ca
sarvasattvanamaskṛtam|
sarvasattvābhigamyaṁ ca
antarāpaṇavadyathā||50||
yathecchayā me saṁbodhiḥ
sākṣī me'tra tathāgataḥ|
vistīrṇaṁ deśayiṣyāmi
dharmaṁ duḥkhapramocanam||51||
atha khalu tasyāṁ
velāyāmāyuṣmān śāriputrastāṁ sāgaranāgarājaduhitarametadavocat-kevalaṁ
kulaputri bodhāya cittamutpannam| avivartyāprameyaprajñā cāsi|
samyaksaṁbuddhatvaṁ tu durlabham| asti kulaputri strī na ca vīryaṁ
sraṁsayati, anekāni
ca kalpaśatānyanekāni ca kalpasahasrāṇi puṇyāni karoti,
ṣaṭ pāramitāḥ paripūrayati,
na cādyāpi buddhatvaṁ prāpnoti| kiṁ kāraṇam?
pañca sthānāni strī adyāpi na prāpnoti| katamāni pañca?
prathamaṁ brahmasthānaṁ dvitīyaṁ śakrasthānaṁ tṛtīyaṁ mahārājasthānaṁ
caturthaṁ cakravartisthānaṁ pañcamamavaivartikabodhisattvasthānam||
atha khalu tasyāṁ velāyāṁ
sāgaranāgarājaduhitureko maṇirasti,
yaḥ kṛtsnāṁ mahāsāhasrāṁ lokadhātuṁ mūlyaṁ kṣamate| sa ca maṇistayā
sāgaranāgarājaduhitrā bhagavate dattaḥ| sa bhagavatā ca anukampāmupādāya
pratigṛhītaḥ| atha sāgaranāgarājaduhitā prajñākūṭaṁ bodhisattvaṁ
sthaviraṁ ca śāriputrametadavocat-yo'yaṁ maṇirmayā bhagavato dattaḥ,
sa ca bhagavatā śīrghraṁ pratigṛhīto veti?
sthavira āha-tvayā ca śīghraṁ datto bhagavatā ca śīghraṁ pratigṛhītaḥ|
sāgaranāgarājaduhitā āha-yadyahaṁ bhadanta śāriputra maharddhikī syām,
śīghrataraṁ samyaksaṁbodhimabhisaṁbudhyeyam| na cāsya maṇeḥ
pratigrāhakaḥ syāt||
atha tasyāṁ velāyāṁ
sāgaranāgarājaduhitā sarvalokapratyakṣaṁ sthavirasya ca śāriputrasya
pratyakṣaṁ tat strīndriyamantarhitaṁ puruṣendriyaṁ ca prādurbhūtaṁ
bodhisattvabhūtaṁ cātmānaṁ saṁdarśayati| tasyāṁ velāyāṁ dakṣiṇāṁ diśaṁ
prakrāntaḥ| atha dakṣiṇasyāṁ diśi vimalā nāma lokadhātuḥ| tatra
saptaratnamaye bodhivṛkṣamūle niṣaṇṇamabhisaṁbuddhamātmānaṁ saṁdarśayati
sma,
dvātriṁśallakṣaṇadharaṁ sarvānuvyajanarūpaṁ prabhayā ca daśadiśaṁ
sphuritvā dharmadeśanāṁ kurvāṇam| ye ca sahāyāṁ lokadhātau sattvāḥ,
te sarve taṁ tathāgataṁ paśyanti sma,
sarvaiśca
devanāgayakṣagandharvāsuragaruḍakinnaramanuṣyāmanuṣyairnamasyamānaṁ
dharmadeśanāṁ ca kurvantam| ye ca sattvāstasya tathāgatasya
dharmadeśanāṁ śṛṇvanti,
sarve te'vinivartanīyā bhavantyanuttarāyāṁ samyaksaṁbodhau| sā ca vimalā
lokadhātuḥ, iyaṁ ca
sahā lokadhātuḥ ṣaḍvikāraṁ prākampat| bhagavataśca śākyamuneḥ
parṣanmaṇḍalānāṁ trayāṇāṁ
prāṇisahasrāṇāmanutpattikadharmakṣāntipratilābho'bhūt| trayāṇāṁ ca
prāṇiśatasahasrāṇāmanuttarāyāṁ samyaksaṁbodhau vyākaraṇapratilābho'bhūt|
atha prajñākūṭo bodhisattvo mahāsattvaḥ sthaviraśca
śāriputrastūṣṇīmabhūtām||
ityāryasaddharmapuṇḍarīke
dharmaparyāye stūpasaṁdarśanaparivarto nāmaikādaśamaḥ||