23
Gadgadasvaraparivartaḥ|
atha khalu bhagavān
śākyamunistathāgato'rhan samyaksaṁbuddhastasyāṁ velāyāṁ
mahāpuruṣalakṣaṇād bhrūvivarāntarādūrṇākośāt prabhāṁ pramumoca,
yayā prabhayā pūrvasyāṁ diśi aṣṭādaśagaṅgānadīvālikāsamāni
buddhakṣetrakoṭīnayutaśatasahasrāṇi ābhayā sphuṭānyabhūvan| tāni ca
aṣṭādaśagaṅgānadīvālikāsamāni
buddhakṣetrakoṭīnayutaśatasahasrāṇyatikramya vairocanaraśmipratimaṇḍitā
nāma lokadhātuḥ,
tatra kamaladalavimalanakṣatrarājasaṁkusumitābhijño nāma tathāgato'rhan
samyaksaṁbuddhastiṣṭhati dhriyate yāpayati vipulenāyuṣpramāṇena|
vipulena bodhisattvasaṁghena sārdhaṁ parivṛtaḥ puraskṛto dharmaṁ
deśayati sma| atha khalu yā bhagavatā śākyamuninā tathāgatenārhatā
samyaksaṁbuddhenorṇākośāt prabhā pramuktāḥ,
sā tasyāṁ velāyāṁ vairocanaraśmipratimaṇḍitāṁ lokadhātuṁ mahatyā ābhayā
spharati sma| tasyāṁ khalu punarvairocanaraśmipratimaṇḍitāyāṁ lokadhātau
gadgadasvaro nāma bodhisattvo mahāsattvaḥ prativasati sma
avaropitakuśalamūlaḥ| dṛṣṭapūrvāśca tena bahūnāṁ tathāgatānāmarhatāṁ
samyaksaṁbuddhānāmevaṁrūpā raśmyavabhāsāḥ|
bahusamādhipratilabdhaśca sa
gadgadasvaro bodhisattvo mahāsattvaḥ| tadyathā
dhvajāgrakeyūrasamādhipratilabdhaḥ saddharmapuṇḍarīkasamādhipratilabdho
vimaladattasamādhipratilabdho nakṣatrarājavikrīḍitasamādhipratilabdhaḥ
anilambhasamādhipratilabdho jñānamudrāsamādhipratilabdhaḥ
candrapradīpasamādhipratilabdhaḥ sarvarutakauśalyasamādhipratilabdhaḥ
sarvapuṇyasamuccayasamādhipratilabdhaḥ prasādavatīsamādhipratilabdhaḥ
ṛddhivikrīḍitasamādhipratilabdho jñānolkāsamādhipratilabdho
vyūharājasamādhipratilabdho vimalaprabhāsasamādhipratilabdho
vimalagarbhasamādhipratilabdho'pkṛtsnasamādhipratilabdhaḥ
sūryāvartasamādhipratilabdhaḥ|
peyālaṁ yāvad
gaṅgānadīvālikopamasamādhikoṭīnayutaśatasahasrapratilabdho gadgadasvaro
bodhisattvo mahāsattvaḥ| tasya khalu punargadgadasvarasya bodhisattvasya
mahāsattvasya sā prabhā kāye nipatitābhūt| atha khalu gadgadasvaro
bodhisattvo mahāsattva utthāyāsanādekāṁsamuttarāsaṅgaṁ kṛtvā dakṣiṇaṁ
jānumaṇḍalaṁ pṛthivyāṁ pratiṣṭhāpya yena bhagavāṁstenāñjaliṁ praṇāmya
taṁ bhagavantaṁ kamaladalavimalanakṣatrarājasaṁkusumitābhijñaṁ
tathāgatamarhantaṁ samyaksaṁbuddhametadavocat-gamiṣyāmyahaṁ bhagavaṁstāṁ
sahāṁ lokadhātuṁ taṁ bhagavantaṁ śākyamuniṁ tathāgatamarhantaṁ
samyaksaṁbuddhaṁ darśanāya vandanāya paryupāsanāya,
taṁ ca mañjuśriyaṁ kumārabhūtaṁ darśanāya,
taṁ ca bhaiṣajyarājaṁ bodhisattvaṁ darśanāya,
taṁ ca pradānaśūraṁ bodhisattvaṁ darśanāya,
taṁ ca nakṣatrarājasaṁkusumitābhijñaṁ bodhisattvaṁ darśanāya,
taṁ ca viśiṣṭacāritraṁ bodhisattvaṁ darśanāya,
taṁ ca vyūharājaṁ bodhisattvaṁ darśanāya,
taṁ ca bhaiṣajyarājasamudgataṁ bodhisattvaṁ darśanāya||
atha khalu bhagavān
kamaladalavimalanakṣatrarājasaṁkusumitābhijñastathāgato'rhan
samyaksaṁbuddhastaṁ gadgadasvaraṁ bodhisattvaṁ mahāsattvametadavocat-na
tvayā kulaputra tasyāṁ sahāyāṁ lokadhātau gatvā hīnasaṁjñotpādayitavyā|
sā khalu punaḥ kulaputra lokadhāturutkūlanikūlāmṛnmayī kālaparvatākīrṇā
gūthoḍillaparipūrṇā| sa ca bhagavān śākyamunistathāgato'rhan
samyaksaṁbuddho hrasvakāyaḥ,
te ca bodhisattvā hrasvakāyāḥ| tava ca kulaputra
dvācatvāriṁśadyojanaśatasahasrāṇyātmabhāvapratilābhaḥ| mama ca kulaputra
aṣṭaṣaṣṭiyojanaśatasahasrāṇyātmabhāvapratilābhaḥ| tvaṁ ca kulaputra
prāsādiko darśanīyo'bhirūpaḥ,
paramaśubhavarṇapuṣkaratayā samanvāgataḥ,
puṇyaśatasahasrātirekalakṣmīkaḥ| tasmāttarhi kulaputra tāṁ sahāṁ
lokadhātuṁ gatvā mā hīnasaṁjñāmutpādayiṣyasi tathāgate ca bodhisattveṣu
ca tasmiṁśca buddhakṣetre||
evamukte gadgadasvaro
bodhisattvo mahāsattvastaṁ bhagavantaṁ
kamaladalavimalanakṣatrarājasaṁkusumitābhijñaṁ tathāgatamarhantaṁ
samyaksaṁbuddhametadavocat-tathāhaṁ bhagavan kariṣye,
yathā tathāgata ājñāpayati| gamiṣyāmyahaṁ bhagavaṁstāṁ sahāṁ lokadhātuṁ
tathāgatādhiṣṭhānena tathāgatabalādhānena tathāgatavikrīḍitena
tathāgatavyūhena tathāgatābhyudgatajñānena| atha khalu gadgadasvaro
bodhisattvo mahāsattvastasyāṁ velāyāmanuccalita eva tasmād
buddhakṣetrādanutthitaścaiva tasmādāsanāt tathārūpaṁ samādhiṁ
samāpadyate sma,
yasya samādheḥ samanantarasamāpannasya gadgadasvarasya bodhisattvasya
atha tāvadeveha sahāyāṁ lokadhātau gṛdhrakūṭe parvate tasya
tathāgatadharmāsanasya purastāccaturaśītipadmakoṭīnayutaśatasahasrāṇi
prādurbhūtānyabhūvan suvarṇadaṇḍāni rupyapatrāṇi padmakiṁśukarvaṇāni
saṁdṛśyante sma||
atha khalu mañjuśrīḥ
kumārabhūtastaṁ padmavyūhaprādurbhāvaṁ dṛṣṭvā bhagavantaṁ śākyamuniṁ
tathāgatamarhantaṁ samyaksaṁbuddhametadavocat-kasyedaṁ bhagavan
pūrvanimittaṁ yenemāni caturaśītipadmakoṭīnayutaśatasahasrāṇi
saṁdṛśyante sma suvarṇadaṇḍāni rūpyapatrāṇi padmakiṁśukavarṇāni?
evamukte bhagavān mañjuśriyaṁ kumārabhūtametadavocat-eṣa mañjuśrīḥ
pūrvasmāddigbhāgādvairocanaraśmipratimaṇḍitāyā lokadhātostasya
bhagavataḥ kamaladalavimalanakṣatrarājasaṁkusumitābhijñasya
tathāgatasyārhataḥ samyaksaṁbuddhasya buddhakṣetrād gadgadasvaro
bodhisatvo mahāsattvaścaturaśītibodhisattvakoṭīnayutaśatasahasraiḥ
parivṛtaḥ puraskṛta imāṁ sahāṁ lokadhātumāgacchati mama darśanāya
vandanāya paryupāsanāya,
asya ca saddharmapuṇḍarīkasya dharmaparyāyasya śravaṇāya| atha khalu
mañjuśrīḥ kumārabhūto bhagavantametadavocat-kastena bhagavan kulaputreṇa
kuśalasaṁbhāraḥ kṛtaḥ,
yena sa kuśalasaṁbhāreṇa kṛtenopacitena ayaṁ viśeṣaḥ pratilabdhaḥ?
katamasmiṁśca bhagavan samādhau sa bodhisattvaścarati?
taṁ vayaṁ bhagavan samādhiṁ śṛṇuyāma,
tatra ya vayaṁ bhagavan samādhau carema| taṁ ca vayaṁ bhagavan
bodhisattvaṁ mahāsattvaṁ paśyema,
kīdṛśastasya bodhisattvasya varṇaḥ,
kīdṛg rūpam, kīdṛg
liṅgam, kīdṛkū
saṁsthānam,
ko'syācāra iti| tatsādhu bhagavan karotu tathāgatastathārūpaṁ nimittaṁ
yena nimittena saṁcoditaḥ samānaḥ sa bodhisattvo mahāsattva imāṁ sahāṁ
lokadhātumāgacchet||
atha khalu bhagavān
śākyamunistathāgato'rhan samyaksaṁbuddhastaṁ bhagavantaṁ prabhūtaratnaṁ
tathāgatamarhantaṁ samyaksaṁbuddhaṁ parinirvṛtametadavocat-karotu
bhagavāṁstathārūpaṁ nimittaṁ yena gadgadasvaro bodhisattvo mahāsattva
imāṁ sahāṁ lokadhātumāgacchet| atha khalu bhagavān
prabhūtaratnastathāgato'rhan samyaksaṁbuddhaḥ parinirvṛtastasyāṁ velāyāṁ
tathārūpaṁ nimittaṁ prāduścakāragadgadasvarasya bodhisattvasya
mahāsattvasya saṁcodanārtham-āgaccha kulaputra imāṁ sahāṁ lokadhātum|
ayaṁ tu mañjuśrīḥ kumārabhūto darśanamabhinandati| atha khalu
gadgadasvaro bodhisattvo mahāsattvastasya bhagavataḥ
kamaladalavimalanakṣatrarājasaṁkusumitābhijñasya tathāgatasyārhataḥ
samyaksaṁbuddhasya pādau śirasābhivandya triḥ pradakṣiṇīkṛtya sārdhaṁ
taiścaturaśītibodhisattvakoṭīnayutaśatasahasraiḥ parivṛtaḥ
puraskṛtastasyā vairocanaraśmipratimaṇḍitāyā lokadhātorantarhitaḥ imāṁ
sahāṁ lokadhātumāgacchati sma,
prakampadbhiḥ kṣetraiḥ,
pravarṣadbhiḥ padmaiḥ,
pravādyamānaistūryakoṭīnayutaśatasahasraiḥ,
nīlotpalapadmanetreṇa vadanena,
suvarṇavarṇena kāyena,
puṇyaśatasahasrālaṁkṛtenātmabhāvena,
śriyā jājvalyamānaḥ,
tejasā dedīpyamānaḥ,
lakṣaṇairvicitritagātro nārāyaṇasaṁhananakāyaḥ| saptaratnamayaṁ
kūṭāgāramabhiruhya vaihāyase saptatālamātreṇa bodhisattvagaṇaparivṛtaḥ
puraskṛta āgacchati sma|
sa yeneyaṁ sahā lokadhātuḥ,
yena ca gṛdhrakūṭaḥ parvatarājastenopasaṁkrāmat| upasaṁkramya tasmāt
kūṭāgārādavatīrya śatasahasramūlyaṁ muktāhāraṁ gṛhītvā yena
bhagavāṁstenopasaṁkrāmat| upasaṁkramya bhagavataḥ pādau śirasābhivandya
saptakṛtvaḥ pradakṣiṇīkṛtya taṁ muktāhāraṁ bhagavataḥ pūjākarmaṇe
niryātayāmāsa| niryātya ca
bhagavantametadavocat-kamaladalavimalanakṣatrarājasaṁkusumitābhijño
bhagavāṁstathāgato'rhan samyaksaṁbuddho bhagavataḥ paripṛcchati
alpābādhatām ālpataṅkatāṁ laghūtthānatāṁ yātrāṁ balaṁ
sukhasaṁsparśavihāratām| evaṁ ca sa bhagavānavocat-kaccitte bhagavan
kṣamaṇīyam, kaccid
yāpanīyam,
kacciddhātavaḥ pratikurvanti,
kaccitte sattvāḥ svākārāḥ suvaineyāḥ sucikitsāḥ,
kaccicchucikāyā mā atīva rāgacaritāḥ,
mā atīva dveṣacaritā mā atīva mohacaritā mā atīva bhagavan sattvā
īrṣyālukā mā matsariṇo mā amātṛjñā mā apitṛjñā mā aśrāmaṇya mā
abrāhmaṇyā mā mithyādṛṣṭyo mā adāntacittā mā aguptendriyāḥ| kaccitte
bhagavan nihatamārapratyarthikā ete sattvāḥ| kaccid bhagavan
prabhūtaratnastathāgato'rhan samyaksaṁbuddhaḥ parinirvṛtaḥ imāṁ sahāṁ
lokadhātumāgato dharmaśravaṇāya saptaratnamaye stūpe madhyagataḥ| taṁ ca
bhagavantaṁ tathāgatarmahantaṁ samyaksaṁbuddhaṁ sa bhagavān
paripṛcchati-kaccidbhagavaṁstasya bhagavataḥ prabhūtaratnasya
tathāgatasyārhataḥ samyaksaṁbuddhasya kṣamaṇīyam,
kaccid yāpanīyam,
kaccid bhagavan prabhūtaratnastathāgato'rhan samyaksaṁbuddhaściraṁ
sthāsyati| vayamapi bhagavaṁstasya prabhūtaratnasya tathāgatasyārhataḥ
samyaksaṁbuddhasya dhātuvigrahaṁ paśyema| tatsādhu bhagavān darśayatu
tathāgatastasya bhagavataḥ prabhūtaratnasya tathāgatasyārhataḥ
samyaksaṁbuddhasya dhātuvigrahamiti||
atha khalu bhagavān
śākyamunistathāgato'rhan samyaksaṁbuddhastaṁ bhagavantaṁ prabhūtaratnaṁ
tathāgatamarhantaṁ samyaksaṁbuddhaṁ parinirvṛtametadavocat-ayaṁ bhagavan
gadgadasvaro bodhisattvo mahāsattvo bhagavantaṁ prabhūtaratnaṁ
tathāgatamarhantaṁ samyaksaṁbuddhaṁ parinirvṛtaṁ draṣṭukāmaḥ| atha khalu
bhagavān prabhūtaratnastathāgato'rhan samyaksaṁbuddhastaṁ gadgadasvaraṁ
bodhisattvaṁ mahāsattvametadavocat-sādhu sādhu kulaputra,
yatra hi nāma tvaṁ bhagavantaṁ śākyamuniṁ tathāgatamarhantaṁ
samyaksaṁbuddhaṁ draṣṭukāmo'bhyāgataḥ,
imaṁ ca saddharmapuṇḍarīkaṁ dharmaparyāya śrāvaṇāya mañjuśriyaṁ ca
kumārabhūtaṁ darśanāyeti||
atha khalu
padmaśrīrbodhisattvo mahāsattvo bhagavantametadavocat-kīdṛśaṁ bhagavan
gadgadasvareṇa bodhisattvena mahāsattvena pūrvaṁ kuśalamūlamavaropitam,
kasya vā tathāgatasyāntike?
atha khalu bhagavān śākyamunistathāgato'rhan samyaksaṁbuddhaḥ
padmaśriyaṁ bodhisattvaṁ mahāsattvametadavocat-bhūtapūrvaṁ kulaputra
atīte'dhvani asaṁkhyeye kalpe asaṁkhyeyatare vipule aprameye apramāṇe
yadāsīt| tena kālena tena samayena meghadundubhisvararājo nāma
tathāgato'rhan samyaksaṁbuddho loka udapādi vidyācaraṇasaṁpannaḥ sugato
lokavidanuttaraḥ puruṣadamyasārathiḥ śāstā devānāṁ ca manuṣyāṇāṁ ca
buddho bhagavān sarvarūpasaṁdarśanāyāṁ lokadhātau priyadarśane kalpe|
tasya khalu punaḥ kulaputra bhagavato meghadundubhisvararājasya
tathāgatasyārhataḥ samyaksaṁbuddhasya gadgadasvareṇa bodhisattvena
mahāsattvena tūryaśatasahasrapravāditena dvādaśavarṣaśatasahasrāṇi pūjā
kṛtābhūt| saptaratnamayānāṁ ca bhājanānāṁ caturaśītisahasrāṇi
dattānyabhūvan| tatra kulaputra meghadundubhisvararājasya tathāgatasya
pravacane gadgadasvareṇa bodhisattvena mahāsattvena iyamīdṛśī śrīḥ
prāptā| syāt khalu punaste kulaputra kāṅkṣā vā vimatirvā vicikitsā
vā-anyaḥ sa tena kālena tena samayena gadgadasvaro nāma bodhisattvo
mahāsattvo'bhūt, yena
sā tasya bhagavato meghadundubhisvararājasya tathāgatasyārhataḥ
samyaksaṁbuddhasya pūjā kṛtā,
tāni caturaśītibhājanasahasrāṇi dattāni?
na khalu punaste kulaputra evaṁ draṣṭavyam| tatkasya hetoḥ?
ayameva sa kulaputra gadgadasvaro bodhisattvo mahāsattvo'bhūt,
yena sā tasya bhagavato meghadundubhisvararājasya tathāgatasyārhataḥ
samyaksaṁbuddhasya pūjā kṛtā,
tāni caturaśitibhājanasahasrāṇi dattāni| evaṁ bahubuddhaparyupāsitaḥ
kulaputra gadgadasvaro bodhisattvo mahāsattvaḥ
bahubuddhaśatasahasrāvaropitakuśalamūlaḥ kṛtabuddhaparikarmā|
dṛṣṭapūrvāścānena
gadgadasvareṇa bodhisattvena mahāsattvena gaṅgānadīvālikāsamā buddhā
bhagavantaḥ| paśyasi tvaṁ padmaśrīretaṁ gadgadasvaraṁ bodhisattvaṁ
mahāsattvam?
padmaśrīrāha-paśyāmi bhagavan,
paśyāmi sugata| bhagavānāha-eṣa khalu punaḥ padmaśrīrgadgadasvaro
bodhisattvo mahāsattvo bahubhī rūpairimaṁ saddharmapuṇḍarīkaṁ
dharmaparyāyaṁ deśayati sma| tadyathā-kvacid brahmarūpeṇa,
kvacid rūdrarūpeṇa,
kvacicchakrarūpeṇa,
kvacidīśvararūpeṇa,
kvacit senāpatirūpeṇa,
kvacid vaiśravaṇarūpeṇa,
kvaciccakravartirūpeṇa,
kvacit koṭṭarājarūpeṇa,
kvacicchreṣṭhirūpeṇa,
kvacid gṛhapatirūpeṇa,
kvacinnaigamarūpeṇa,
kvacid brāhmaṇarūpeṇa imaṁ saddharmapuṇḍarīkaṁ dharmaparyāyaṁ deśayati
sma| kvacid bhikṣurūpeṇa,
kvacid bhikṣuṇīrūpeṇa,
kvacidupāsakarūpeṇa,
kvacidupāsikārūpeṇa kvacicchreṣṭhibhāryārūpeṇa,
kvacid gṛhapatibhāryārūpeṇa,
kvacinnaigamabhāryārūpeṇa,
kvaciddārakarūpeṇa,
kvaciddārikārūpeṇa,
gadgadasvaro bodhisattvo mahāsattvaḥ imaṁ saddharmapuṇḍarīkaṁ
dharmaparyāyaṁ sattvānāṁ deśayati sma| iyadbhiḥ kulaputra
rūpasaṁdarśanairgadgadasvaro bodhisatvo mahāsattva imaṁ
saddharmapuṇḍarīkaṁ dharmaparyāyaṁ sattvānāṁ deśayati sma| yāvat
keṣāṁcid yakṣarūpeṇa gadgadasvaro bodhisattvo mahāsattva imaṁ
saddharmapuṇḍarīkaṁ dharmaparyāyaṁ sattvānāṁ deśayati sma| keṣāṁcit
surarūpeṇa, keṣāṁcid
garūḍarūpeṇa,
keṣāṁcit kinnararūpeṇa,
keṣāṁcinmahoragarūpeṇa gadgadasvaro bodhisattvo mahāsattva imaṁ
saddharmapuṇḍarīkaṁ dharmaparyāyaṁ sattvānāṁ deśayati sma|
yāvannirayatiryagyoniyamalokākṣaṇopapannānāmapi sattvānāṁ gadgadasvaro
bodhisattvo mahāsattva imaṁ saddharmapuṇḍarīkaṁ dharmaparyāyaṁ
deśayaṁstrātā bhavati| yāvadantaḥpuramadhyagatānāmapi sattvānāṁ
gadgadasvaro bodhisattvo mahāsattvaḥ strīrūpamabhinirmāya ima
saddharmapuṇḍarīkaṁ dharmaparyāyaṁ sattvānāṁ deśayati sma| asyāṁ sahāyāṁ
lokadhātau sattvānāṁ dharmaṁ deśayati sma| trātā khalvapi
padmaśrīrgadgadasvaro bodhisattvo mahāsattvaḥ sahāyāṁ
lokadhātāvupapannānāṁ sattvānām| tasyāṁ ca sahāyāṁ lokadhātāveva sa
gadgadasvaro bodhisattvo mahāsattva iyadbhī rūpanimittairimaṁ
saddharmapuṇḍarīkaṁ dharmaparyāyaṁ sattvānāṁ deśayati| na cāsya
satpuruṣasya ṛddhihānirnāpi prajñāhāniḥ| iyadbhiḥ kulaputra
jñānāvabhāsairgadgadasvaro bodhisattvo mahāsattvo'syāṁ sahāyāṁ
lokadhātau prajñāyate| anyeṣu ca gaṅgānadīvālikāsameṣu lokadhātuṣu
bodhisattvavaineyānāṁ sattvānāṁ bodhisattvarūpeṇa dharmaṁ deśayati|
śrāvakavaineyānāṁ sattvānāṁ śrāvakarūpeṇa dharmaṁ deśayati|
pratyekabuddhavaineyānāṁ sattvānāṁ pratyekabuddharūpeṇa dharmaṁ
deśayati| tathāgatavaineyānāṁ sattvānāṁ tathāgatarūpeṇa dharmaṁ
deśayati| yāvattathāgatadhātuvaineyānāṁ sattvānāṁ tathāgatadhātuṁ
darśayati| yāvat parinirvāṇavaineyānāṁ sattvānāṁ parinirvṛtamātmānaṁ
darśayati| evaṁ jñānabalādhānaprāptaḥ khalu punaḥ padmaśrīrgadgadasvaro
bodhisattvo mahāsattvaḥ||
atha khalu
padmaśrīrbodhisattvo mahāsattvo
bhagavantametadavocat-avaropitakuśalamūlo'yaṁ bhagavan gadgadasvaro
bodhisattvo mahāsattvaḥ| katama eṣa bhagavan samādhiryasmin
samādhāvavasthitena gadgadasvareṇa bodhisattvena mahāsattvena iyantaḥ
sattvā vinītā iti?
evamukte bhagavān śākyamunistathāgato'rhan samyaksaṁbuddhaḥ padmaśriyaṁ
bodhisattvaṁ mahāsattvametadavocat- eṣa hi kulaputra sarvarūpasaṁdarśano
nāma samādhiḥ| asmin samādhāvavasthitena gadgadasvareṇa bodhisattvena
mahāsattvena evamaprameyaḥ sattvārthaḥ kṛtaḥ||
asmin khalu
punargadgadasvaraparivarte nirdiśyamāne yāni gadgadasvareṇa
bodhisattvena mahāsattvena sārdhaṁ
caturaśītibodhisattvakoṭīnayutaśatasahasrāṇi imāṁ sahāṁ
lokadhātumāgatāni,
sarveṣāṁ teṣāṁ sarvarūpasaṁdarśanasya samādheḥ pratilambho'bhūt| asyāṁ
ca sahāyāṁ lokadhātau gaṇanāsamatikrāntānāṁ bodhisattvānāṁ mahāsattvānāṁ
yeṣāṁ sarvarūpasaṁdarśanasya samādheḥ pratilambho'bhūt||
atha khalu gadgadasvaro
bodhisattvo mahāsattvo bhagavataḥ śākyamunestathāgatasyārhataḥ
samyaksaṁbuddhasya tasya ca bhagavataḥ prabhūtaratnasya
tathāgatasyārhataḥ samyaksaṁbuddhasya dhātustūpe vipulāṁ vistīrṇāṁ pūjāṁ
kṛtvā punarapi saptaratnamaye kūṭāgāre'bhiruhya prakampadbhiḥ kṣetraiḥ
pravarṣadbhiḥ padmaiḥ pravādyamānaistūryakoṭīnayutaśatasahasraiḥ sārdhaṁ
taiścaturaśītibodhisattvakoṭīnayutaśatasahasraiḥ parivṛtaḥ puraskṛtaḥ
punarapi svaṁ buddhakṣetramabhigataḥ| samabhigamya ca taṁ bhagavantaṁ
kamaladalavimalanakṣatrarājasaṁkusumitābhijñaṁ tathāgatamarhantaṁ
samyaksaṁbuddhametadavocat-kṛto me bhagavan sahāyāṁ lokadhātau
sattvārthaḥ| tasya ca bhagavataḥ prabhūtaratnasya tathāgatasyārhataḥ
samyaksaṁbuddhasya dhātustūpo dṛṣṭaḥ vanditaśca| sa ca bhagavān
śākyamunistathāgato dṛṣṭo vanditaśca| sa ca mañjuśrīḥ kumārabhūto dṛṣṭaḥ|
sa ca bhaiṣajyarājo bodhisattvo mahāsattvo vīryabalabegaprāptaḥ,
sa ca pradānaśūro bodhisattvo mahāsattvo dṛṣṭaḥ| sarveṣāṁ ca teṣāṁ
caturaśītibodhisattvakoṭīnayutaśatasahasrāṇāṁ sarvarūpasaṁdarśanasya
samādheḥ pratilambho'bhūt||
asmin khalu
punargadgadasvarasya bodhisattvasya mahāsattvasya gamanāgamanaparivarte
bhāṣyamāṇe dvācatvāriṁśatāṁ
bodhisattvasahasrāṇāmanutpattikadharmakṣāntipratilambho'bhūt|
padmaśriyaśca bodhisattvasya mahāsattvasya saddharmapuṇḍarīkasya
samādheḥ pratilambho'bhūt||
iti śrīsaddharmapuṇḍarīke
dharmaparyāye gadgadasvaraparivarto nāma trayoviṁśatimaḥ||