25
Śubhavyūharājapūrvayogaparivartaḥ|
atha khalu bhagavān
sarvāvantaṁ bodhisattvagaṇamāmantrayāmāsa-bhūtapūrvaṁ kulaputra
atīte'dhvanyasaṁkhyeyaiḥ kalpairasaṁkhyeyatarairyadāsīt| tena kālena
tena samayena jaladharagarjitaghoṣasusvaranakṣatrarājasaṁkusumitābhijño
nāma tathāgato'rhan samyaksaṁbuddho loka udapādi,
vidyācaraṇasaṁpannaḥ sugato lokavidanuttaraḥ puruṣadamyasārathiḥ śāstā
devānāṁ ca manuṣyāṇāṁ ca buddho bhagavān priyadarśane kalpe
vairocanaraśmipratimaṇḍitāyāṁ lokadhātau| tasya khalu punaḥ kulaputrā
jaladharagarjitaghoṣasusvaranakṣatrarājasaṁkusumitābhijñasya
tathāgatasya pravacane śubhavyūho nāma rājābhūt| tasya khalu punaḥ
kulaputrā rājñaḥ śubhavyūhasya vimaladattā nāma bhāryābhūt| tasya khalu
punaḥ kulaputrā rājñaḥ śubhavyūhasya dvau putrāvabhūtām-eko vimalagarbho
nāma, dvitīyo
vimalanetro nāma| tau ca dvau dārakāvṛddhimantau cābhūtām,
prajñāvantau ca puṇyavantau ca jñānavantau ca bodhisattvacaryāyāṁ ca
abhiyuktāvabhūtām| tadyathā-dānapāramitāyāmabhiyuktāvabhūtām,
śīlapāramitāyāṁ kṣāntipāramitāyāṁ vīryapāramitāyāṁ dhyānapāramitāyāṁ
prajñāpāramitāyāmupāyakauśalyapāramitāyāṁ maitryāṁ karuṇāyāṁ
muditāyāmupekṣāyāṁ yāvat saptatriṁśatsu bodhipakṣikeṣu dharmeṣu|
sarvatra pāraṁgatāvabhūtām,
vimalasya samādheḥ pāraṁgatau,
nakṣatrarājādityasya samādheḥ pāraṁgatau,
vimalanirbhāsasya samādheḥ pāraṁgatau,
vimalabhāsasya samādheḥ pāraṁgatau,
alaṁkāraśubhasya samādheḥ pāraṁgatau,
mahātejogarbhasya samādheḥ pāraṁgatāvabhūtām| sa ca bhagavāṁstena kālena
tena samayena imaṁ saddharmapuṇḍarīkaṁ dharmaparyāyaṁ deśayāmāsa teṣāṁ
sattvānāmanukampāyai,
tasya ca rājñaḥ śubhavyūhasyānukampāyai| atha khalu kulaputrā
vimalagarbho dārako vimalanetraśca dārako yena svamātā janayitrī,
tenopasaṁkrāmatām|
upasaṁkramya
daśanakhamañjaliṁ pragṛhya janayitrīmetadavocatām ehyamba
gamiṣyāvastasya bhagavato
jaladharagarjitaghoṣasusvaranakṣatrarājasaṁkusumitābhijñasya
tathāgatasyārhataḥ samyaksaṁbuddhasya sakāśam taṁ bhagavantaṁ
jaladharagarjitaghoṣasusvaranakṣatrarājasaṁkusumitābhijñaṁ
tathāgatamarhantaṁ samyaksaṁbuddhaṁ darśanāya vandanāya paryupāsanāya|
tatkasya hetoḥ? eṣa
hyamba sa bhagavān
jaladharagarjitaghoṣasusvaranakṣatrarājasaṁkusumitābhijñastathāgato'rhan
samyaksaṁbuddhaḥ sadevakasya lokasya purataḥ saddharmapuṇḍarīkaṁ nāma
dharmaparyāyaṁ visteraṇa saṁprakāśayati,
taṁ śravaṇāya gamiṣyāvaḥ| evamukte kulaputrā vimaladattā rājabhāryā
vimalagarbhaṁ dārakaṁ vimalanetraṁ ca dārakametadavocat-eṣa khalu
kulaputrau yuvayoḥ pitā rājā śubhavyūho brāhmaṇeṣvabhiprasannaḥ|
tasmānna lapsyatha taṁ tathāgataṁ darśanāyābhigantum| atha khalu
kulaputrā vimalagarbho dārako vimalanetraśca dārako daśanakhamañjaliṁ
pragṛhya tāṁ svamātaraṁ janayitrīmetadavocatām-mithyādṛṣṭikule'sminnāvāṁ
jātau? āvāṁ
punardharmarājaputrāviti| atha khalu kulaputrā vimaladattā rājabhāryā
tau dvau dārakāvetadavocat-sādhu sādhu kulaputrau| yuvāṁ tasya svapitū
rājñaḥ śubhavyūhasyānukampāyai kiṁcideva prātihāryaṁ saṁdarśayatam|
apyeva nāma yuvayorantike prasādaṁ kuryāt| prasannacittaśca
asmākamanujānīyāt tasya bhagavato
jaladharagarjitaghoṣasusvaranakṣatrarājasaṁkusumitābhijñasya
tathāgatasyārhataḥ samyaksaṁbuddhamabhigantum||
atha khalu kulaputrā
vimalagarbho dārako vimalanetraśca dārakastasyāṁ velāyāṁ saptatālamātraṁ
vaihāyasamabhyudgamya tasya pitū rājñaḥ śubhavyūhasyānukampāyai
buddhānujñātāni yamakāni prātihāryāṇyakurutām| tau tatraivāntarīkṣe
gatau śayyāmakalpayatām| tatraivāntarīkṣe caṁkramataḥ,
tatraivāntarīkṣe rajo vyadhunītām,
tatraivāntarīkṣe'dhaḥkāyādvāridhārāṁ pramumocatuḥ,
ūrdhvakāyādagniskandhaṁ prajvālayataḥ sma| ūrdhvakāyādvāridhārāṁ
pramumocatuḥ,
adhaḥkāyādagniskandhaṁ prajvālayataḥ sma| tau tasminnevākāśe mahāntau
bhūtvā khuḍḍakau bhavataḥ,
khuḍḍakau bhūtvā mahāntau bhavataḥ| tasminnevāntarīkṣe'ntardhāyataḥ|
pṛthivyāmunmajjataḥ| pṛthivyāmunmajjitvā ākāśaunmajjataḥ| iyadbhiḥ khalu
punaḥ kulaputrā ṛddhiprātihāryaistābhyāṁ dvābhyāṁ dārakābhyāṁ sa
śubhavyūho rājā svapitā vinītaḥ| atha khalu kulaputrāḥ sa rājā
śubhavyūhastayordārakayostamṛddhiprātihāryaṁ dṛṣṭvā tasyāṁ velāyāṁ tuṣṭa
udagra āttamanāḥ pramuditaḥ prītisaumanasyajāto daśanakhamañjaliṁ
pragṛhya tau dārakāvetadavocat-ko yuvayoḥ kulaputrau śāstā,
kasya vā yuvāṁ śiṣyāviti?
atha khalu kulaputrāstau dvau dārakau taṁ rājānaṁ
śubhavyūhametadavocat-eṣa sa mahārāja bhagavān
jaladharagarjitaghoṣasusvaranakṣatrarājasaṁkusumitābhijñastathāgato'rhan
samyaksaṁbuddhastiṣṭhati dhriyate yāpayati ratnamaye bodhivṛkṣamūle
dharmāsanopaviṣṭaḥ| sadevakasya lokasya purataḥ saddharmapuṇḍarīkaṁ nāma
dharmaparyāyaṁ vistareṇa saṁprakāśayati| sa āvayorbhagavān śāstā|
tasyāvāṁ mahārāja śiṣyau| atha khalu kulaputrāḥ sa rājā śubhavyūhastau
dārakāvetadavocat-paśyāmo vayaṁ kulaputrau taṁ yuvayoḥ śāstāram|
gamiṣyāmo vayaṁ tasya bhagavataḥ sakāśam||
atha khalu kulaputrāstau
dvau dārakau tato'ntarīkṣādavatīrya yena svamātā janayitrī
tenopasaṁkrāmatām| upasaṁkramya daśanakhamañjaliṁ pragṛhya svamātaraṁ
janayitrīmetadavocatām-eṣa āvābhyāmamba vinītaḥ svapitā anuttarāyāṁ
samyaksaṁbodhau| kṛtamāvābhyāṁ pituḥ śāstṛkṛtyam|
tadidānīmutsraṣṭumarhasi| āvāṁ tasya bhagavataḥ sakāśe pravrajiṣyāva
iti||
atha khalu kulaputrā
vimalagarbho dārako vimalanetraśca dārakastasyāṁ velāyāṁ svamātaraṁ
janayitrīṁ gāthābhyāmadhyabhāṣatām-
anujānīhyāvayoramba
pravrajyāmanagārikām|
āvāṁ vai pravrajiṣyāvo
durlabho hi tathāgataḥ||1||
audumbaraṁ yathā puṣpaṁ
sudurlabhataro jinaḥ|
utsṛjya pravrajiṣyāvo
durlabhā kṣaṇasaṁpadā||2||
vimaladattā rājabhāryā āha-
utsṛjāmi yuvāmadya gacchathā
sādhu dārakau|
vayaṁ pi pravrajiṣyāmo
durlabho hi tathāgataḥ||3|| iti||
atha khalu kulaputrāstau
dvau dārakāvime gāthe bhāṣitvā tau mātāpitarāvetadavocatām-sādhu amba
tāta eta| vayaṁ sarve sahitā bhūtvā gamiṣyāmastasya bhagavato
jaladharagarjitaghoṣasusvaranakṣatrarājasaṁkusumitābhijñasya
tathāgatasyārhataḥ samyaksaṁbuddhasya sakāśam| upasaṁkramiṣyāmastaṁ
bhagavantaṁ darśanāya vandanāya paryupāsanāya dharmaśravaṇāya| tatkasya
hetoḥ? durlabho
hyamba tāta buddhotpādaḥ,
udumbarapuṣpasadṛśo mahārṇavyugacchidrakūrmagrīvāpraveśavat|
durlabhaprādurbhāvā amba buddhā bhagavantaḥ| tasmāttarhi amba tāta
paramapuṇyopastabdhā vayamīdṛśe pravacane upapannāḥ| tat sādhu amba tāta
utsṛjadhvam| āvāṁ gamiṣyāvaḥ| tasya bhagavato
jaladharagarjitaghoṣasusvaranakṣatrarājasaṁkusumitābhijñasya
tathāgatasyārhataḥ samyaksaṁbuddhasya sakāśe pravrajiṣyāvaḥ| durlabhaṁ
hi amba tāta tathāgatānāṁ darśanam| durlabho hyadya kālaḥ| īdṛśo
dharmarājā| paramadurlabhedṛśī kṣaṇasaṁpat||
tena khalu punaḥ kulaputrāḥ
samayena tasya rājñaḥ śūbhavyūhasya
antaḥpurāccaturaśītirantaḥpurikāsahasrāṇi asya saddharmapuṇḍarīkasya
dharmaparyāyasya bhājanabhutānyabhūvan| vimalanetraśca dārako'smin
dharmaparyāye caritāvī| vimalagarbhaśca dārako
bahukalpakoṭīnayutaśatasahasrāṇi sarvasattvapāpajahane samādhau
carito'bhūt kimiti sarvasattvāḥ sarvapāpaṁ jaheyuriti| sā ca
tayordārakayormātā vimaladattā rājabhāryā sarvabuddhasaṁgītiṁ
sarvabuddhadharmaguhyasthānāni ca saṁjānīte sma| atha khalu kulaputrā
rājā śubhavyūhastābhyāṁ dvābhyāṁ dārakābhyāṁ tathāgataśāsane vinītaḥ,
avatāritaśca,
paripācitaśca sarvasvajanaparivāraḥ| sā ca vimaladattā rājabhāryā
sarvasvajanaparivārā tau ca dvau dārakau rājñaḥ śubhavyūhasya putrau
dvācatvāriṁśadbhiḥ prāṇisahasraiḥ sārdhaṁ sāntapurau sāmātyau sarve
sahitāḥ samagrāḥ yena bhagavān
jaladharagarjitaghoṣasusvaranakṣatrarājasaṁkusumitābhijñastathāgato'rhan
samyaksaṁbuddhaḥ,
tenopasaṁkrāman| upasaṁkramya tasya bhagavataḥ pādau śirasābhivandya taṁ
bhagavantaṁ triṣkṛtvaḥ pradakṣiṇīkṛtya ekānte tasthuḥ||
atha khalu kulaputrāḥ sa
bhagavān
jaladharagarjitaghoṣasusvaranakṣatrarājasaṁkusumitābhijñastathāgato'rhan
samyaksaṁbuddho rājānaṁ śubhavyūhaṁ saparivāramupasaṁkrāntaṁ viditvā
dhārmyā kathayā saṁdarśayati samādāpayati samuttejayati saṁpraharṣayati|
atha khalu kulaputrā rājā śubhavyūhastena bhagavatā dhārmyā kathayā
sādhu ca suṣṭhu ca saṁdarśitaḥ samādāpitaḥ samuttejitaḥ
saṁpraharṣitastasyāṁ velāyāṁ tuṣṭa udagra āttamanāḥ pramuditaḥ
prītisaumanasyajātaḥ kanīyaso bhrātuḥ paṭṭaṁ baddhvā rājye pratiṣṭhāpya
saputrasvajanaparivāraḥ,
sā ca vimaladattā rājabhāryā sarvastrīgaṇaparivārā,
tau ca dvau dārakau sārdhaṁ tairdvācatvāriṁśadbhiḥ prāṇisahasraiḥ,
sarve sahitāḥ samagrāstasya bhagavato
jaladharagarjitaghoṣasusvaranakṣatrarājasaṁkusumitābhijñasya
tathāgatasyārhataḥ samyaksaṁbuddhasya pravacane śraddhayā
agārādanagārikāṁ pravrajitāḥ| pravrajitvā ca rājā śubhavyūhaḥ
saparivāraścaturaśītivarṣasahasrāṇyabhiyukto vijahāra imaṁ
saddharmapuṇḍarīkaṁ dharmaparyāyaṁ cintayan bhāvayan paryavadāpayan|
atha khalu kulaputrāḥ sa rājā śubhavyūhasteṣāṁ caturaśītīnāṁ
varṣasahasrāṇāmatyayena sarvaguṇālaṁkāravyūhaṁ nāma samādhiṁ
pratilabhate sma| sahapratilabdhāccāsya samādheḥ,
atha tāvadeva saptatālamātraṁ vaihāyasamabhyudgacchati sma||
atha khalu kulaputrāḥ sa
rājāḥ śubhavyūho gaganatale sthitastaṁ bhagavantaṁ
jaladharagarjitaghoṣasusvaranakṣatrarājasaṁkusumitābhijñaṁ
tathāgatamarhantaṁ samyaksaṁbuddhametadavocat-imau bhagavan mama putrau
śāstārau bhavataḥ| yadahamābhyāmṛddhiprātihāryeṇa tasmānmahato
dṛṣṭigatādvinivartitaḥ,
tathāgataśāsane ca pratiṣṭhapitaḥ,
paripācitaśca avatāritaśca,
tathāgatadarśanāya ca saṁcoditaḥ| kalyāṇamitrau bhagavan mama tau dvau
dārakau putrarūpeṇa mama gṛha upapannau,
yaduta pūrvakuśalamūlasmaraṇārtham||
evamukte bhagavān
jaladharagarjitaghoṣasusvaranakṣatrarājasaṁkusumitābhijñastathāgato'rhan
samyaksaṁbuddhastaṁ rājānaṁ śubhavyūhametadavocat-evametanmahārāja,
evametad yathā vadasi| avaropitakuśalamūlānāṁ hi mahārāja kulaputrāṇāṁ
kuladuhitṛṇāṁ ca sarveṣu bhavagaticyutyupapattyāyataneṣūpapannānāṁ
sulabhāni bhavanti kalyāṇamitrāṇi,
yāni śāstṛkṛtyena pratyupasthitāni bhavanti,
yānyanuttarāyāṁ samyaksaṁbodhau śāsakānyavatārakāṇi paripācakāni
bhavanti| udārametanmahārāja sthānaṁ yaduta
kalyāṇamitraparigrahastathāgatadarśanasamādāpakaḥ| paśyasi tvaṁ mahārāja
etau dvau dārakau?
āha-paśyāmi bhagavan,
paśyāmi sugata| bhagavānāha-etau khalu punarmahārāja kulaputrau
pañcaṣṭīnāṁ gaṅgānadīvālikāsamānāṁ tathāgatānāmarhatāṁ
samyaksaṁbuddhānāmantike pūjāṁ kariṣyataḥ,
imaṁ ca saddharmapuṇḍarīkaṁ dharmaparyāyaṁ dhārayiṣyataḥ
sattvānāmanukampāyai,
mithyādṛṣṭīnāṁ ca sattvānāṁ samyagdṛṣṭaye vīryasaṁjananārtham||
atha khalu kulaputrāḥ sa
rājā śubhavyūhastato gaganatalādavatīrya daśanakhamañjaliṁ pragṛhya taṁ
bhagavantaṁ jaladharagarjitaghoṣasusvaranakṣatrarājasaṁkusumitābhijñaṁ
tathāgatamarhantaṁ samyaksaṁbuddhametadavocat-tatsādhu bhagavan|
nirdiśatu tathāgataḥ-kīdṛśena jñānena samanvāgatastathāgato'rhan
samyaksaṁbuddho yena mūrdhni uṣṇīṣo vibhāti,
vimalanetraśca bhagavān,
bhruvormadhye corṇā vibhāti śaśiśaṅkhapāṇḍarābhā,
sā ca samasahitā dantāvalī vadanāntare virājati,
bimboṣṭhaśca bhagavāṁścārunetraśca sugataḥ||
atha khalu kulaputrāḥ sa
rāja śubhavyūha iyadbhirguṇaistaṁ bhagavantaṁ
jaladharagarjitaghoṣasusvaranakṣatrarājasaṁkusumitābhijñaṁ
tathāgatamarhantaṁ samyaksaṁbuddhamabhiṣṭutya anyaiśca
guṇakoṭīnayutaśatasahasraistaṁ bhagavantamabhiṣṭutya tasyāṁ velāyāṁ taṁ
bhagavantaṁ jaladharagarjitabhoṣasusvaranakṣatrarājasaṁkusumitābhijñaṁ
tathāgatamarhantaṁ samyaksaṁbuddhametadavocat-āścaryaṁ bhagavan
yāvanmahārthamidaṁ tathāgataśāsanam,
acintyaguṇasamanvāgataśca tathāgatapravedito dharmavinayaḥ,
yāvat suprajñaptā ca tathāgataśikṣā| adyāgreṇa vayaṁ bhagavanna
bhūyaścittasya vaśagā bhaviṣyāmaḥ,
na bhūyo mithyādṛṣṭervaśagā bhaviṣyāmaḥ,
na bhūyaḥ krodhasya vaśagā bhaviṣyāmaḥ,
na bhūyaḥ pāpakānāṁ cittotpādānāṁ vaśagā bhaviṣyāmaḥ| ebhirahaṁ bhagavan
iyadbhirakuśalaidharmaiḥ samanvāgato necchāmi
bhagavato'ntikamupasaṁkramitum| sa tasya bhagavato
jaladharagarjitaghoṣasusvaranakṣatrajasaṁkusumitābhijñasya
tathāgatasyārhataḥ samyaksaṁbuddhasya pādau śirasābhivandya
antarīkṣagata evāsthāt||
atha khalu sa rājā
śubhavyūhaḥ sā ca vimaladattā rājabhāryā śatasahasramūlyaṁ muktāhāraṁ
bhagavata uparyantarīkṣe'kṣaipsīt| samanantarakṣiptaśca sa
muktāhārastasya bhagavato mūrdhni muktāhāraḥ kūṭāgāraḥ
saṁsthito'bhūccaturasraścatuḥsthūṇaḥ samabhāgaḥ suvibhakto darśanīyaḥ|
tasmiṁśca kūṭāgāre paryaṅkaḥ prādurbhūto'nekadūṣyaśatasahasrasaṁstṛtaḥ|
tasmiṁśca paryaṅke tathāgatavigrahaḥ paryaṅkabaddhaṁ saṁdṛśyate sma|
atha khalu rājñaḥ śubhavyūhasyaitadabhavat-mahānubhāvamidaṁ buddhajñānam,
acintyaguṇasamanvāgataśca tathāgataḥ| yatra hi nāma ayaṁ
tathāgatavigrahaḥ kūṭāgāramadhyagataḥ saṁdṛśyate prāsādiko darśanīyaḥ
paramaśubhavarṇapuṣkaratayā samanvāgataḥ||
atha khalu bhagavān
jaladharagarjitaghoṣasusvaranakṣatrarājasaṁkusumitābhijñastathāgataścatasraḥ
parṣadaḥ āmantrayate sma-paśyatha bhikṣavo yūyaṁ śubhavyūhaṁ rājānaṁ
gaganatalasthaṁ siṁhanādaṁ nadantam?
āhuḥ- paśyāmo bhagavan| bhagavānāha-eṣa khalu bhikṣavaḥ śubhavyūho rājā
mama śāsane bhikṣubhāvaṁ kṛtvā śālendrarājo nāma tathāgato'rhan
samyaksaṁbuddho loke bhaviṣyati,
vidyācaraṇasaṁpannaḥ sugato lokavidanuttaraḥ puruṣadamyasārathiḥ śāstā
devānāṁ ca manuṣyāṇāṁ ca buddho bhagavān vistīrṇavatyāṁ lokadhātau|
abhyudgatarājo nāma sa kalpo bhaviṣyati| tasya khalu punarbhikṣavaḥ
śālendrarājasya tathāgatasyārhataḥ samyaksaṁbuddhasya aprameyo
bodhisattvasaṁgho bhaviṣyati,
aprameyaḥ śrāvakasaṁghaḥ| samā pāṇitalajātā ca vaidūryamayī sā
vistīrṇavatī lokadhāturbhaviṣyati| evamacintyaḥ sa tathāgato'rhan
samyaksaṁbuddho bhaviṣyati| syāt khalu punaḥ kulaputrāḥ yuṣmākaṁ kāṅkṣā
vā vimatirvā vicikitsā vā-anyaḥ sa tena kālena tena samayena śubhavyūho
nāma rājābhūt? na
khalu punaḥ kulaputrā yuṣmābhirevaṁ draṣṭavyam| tatkasya hetoḥ?
ayameva sa padmaśrīrbodhisattvo mahāsattvastena kālena tena samayena
śubhavyūho nāma rājābhut| syātkhalu punaḥ kulaputrā yuṣmākaṁ kāṅkṣā vā
vimatirvā vicikitsā vā-anyā sā tena kālena tena samayena vimaladattā
nāma rājabhāryābhūt?
na khalu punaḥ kulaputrā yuṣmābhirevaṁ draṣṭavyam| tatkasya hetoḥ?
ayaṁ sa vairocanaraśmipratimaṇḍitadhvajarājo nāma bodhisattvo
mahāsattvastena kālena tena samayena vimaladattā nāma rājabhāryābhut|
tasya rājñaḥ śubhavyūhasyānukampāyai teṣāṁ ca sattvānāṁ rājñaḥ
śubhavyūhasya bhāryātvamabhyupagato'bhūt| syātkhalu punaḥ kulaputrā
yuṣmākaṁ kāṅkṣā vā vimatirvā vicikitsā vā-anyau tau tena kālena tena
samayena dvau dārakāvabhūtām?
na khalu punaḥ kulaputrā yuṣmābhirevaṁ draṣṭavyam| tatkasya hetoḥ?
imau tau bhaiṣajyarājaśca bhaiṣajyasamundataśca tena kālena tena
samayena tasya rājñaḥ śubhavyūhasya putrāvabhūtām|
evamacintyaguṇasamanvāgatau kulaputrā bhaiṣajyarājo
bhaiṣajyasamudgataśca bodhisattvau mahāsattvau,
bahubuddhakoṭīnayutaśatasahasrāvaropitakuśalamūlau etāvubhāvapi
satpuruṣāvacintyadharmasamanvāgatau| ye ca etayoḥ satpuruṣayornāmadheyaṁ
dhārayiṣyanti, te
sarve namaskaraṇīyā bhaviṣyanti sadevakena lokena||
asmin khalu punaḥ
pūrvayogaparivarte bhāṣyamāṇe caturaśītīnāṁ prāṇisahasrāṇāṁ virajo
vigatamalaṁ dharmeṣu dharmacakṣurviśuddham||
iti śrīsaddharmapuṇḍarīke
dharmaparyāye śubhavyūharājapūrvayogaparivarto nāma pañcaviṁśatimaḥ||